Ховд аймгийн Хөгжлийн төлөө сан 10 жилийн ойн хүрээнд онцлох эрхмүүдийг тодрууллаа

Ховд аймгийн нийгмийн асуудлуудыг шийдэх, эдийн засгийг хөгжүүлэхэд  дэмжлэг үзүүлэх, хүүхэд залуусын боловсролыг бүх талаар дэмжих, аймгийн түүхэн  өв санг хамгаалах, хойч үедээ таниулан үлдээхэд чиглэн 2004 онд байгуулагдсан цагаас хойш нийгэм, хүмүүнлэгийн чиглэлээр тасралтгүй үйл ажиллагаагаа явуулж байгаа “Ховд аймгийн Хөгжлийн төлөө сан” ТББ-ын 10 жилийн ой, шинэ жилийн баярын цэнгүүн 2014 оны 12 сарын 19-нд Улаанбаатар хотод болж өнгөрлөө.

Цэнгүүнд Ховд нутгаар овоглосон болон ажил амьдрал, алдар нэрээ холбосон алдартан гавьяатнууд, эрдэмтэн судлаачид, улс төр, урлаг соёл, спорт, бизнесийн хүрээнийхэн болон оюутан залуусын төлөөлөл оролцжээ.

Хөгжлийн төлөө сан үүсэн байгуулагдсаны 10 жилийн ойгоо тохиолдуулан Ховд аймгийн хөгжил дэвшилд үнэтэй хувь нэмэр оруулсан, аймаг орон нутгийнхаа нэр хүндийг өндөрт өргөж яваа салбар салбарын онцлох хүмүүсийг олон нийтийн нээлттэй санал асуулгаар тодрууллаа.

Салбар салбарт нэр дэвшигчдийг сумдын ЗДТГ-аар дамжуулан байгууллага, иргэдийн саналаар тодруулсан бөгөөд 2014 оны 12 сарын 10-наас 2014 оны 12 дугаар сарын 17-ны өдрийн 14 цаг хүртэл Ховд аймгийн Хөгжлийн төлөө сангийн www.khovdsan.mn цахим хуудсаар дамжуулан иргэд, олон нийтээс санал авч шалгаруулсан байна.

Г.Эрдэм