Иракуудыг амьдаар нь шатаажээ

“Исламын улс” бүлэглэлийн зэвсэгт дайчид Иракийн Мосул хотноо 16 хүнийг хамтран ажиллахаас татгалзсан гэж амьдаар нь шатаажээ. Энэ тухай орон нутггийн түшмэл мэдээлснийг Ираны “Press TV” агентлагаас дамжуулсан байна. “Исламын улс” зэвсэгт бүлэглэлийнхэн Сири дэх Б.Асадын дэглэмтэй тэмцэж байсан бусад бүлэглэлийн нэгэн адил АНУ, Саудын Араб, Катараас нэлээд дэмжлэг авсан түүхтэй. Харин өнгөрсөн оны зунаас тус хөдөлгөөн хүчирхэгжиж, Сирийн нэлээд хэсэг, улмаар Иракийн нутгийн нэг хэсгийг эзэлж, эдгээр нутагт исламын шашны Халифат улс байгуулснаа зарласан байна. Үүний дараа “Исламын улс” бүлэглэлийн тэргүүн Абу Бакр аль-Багдади өөрийгөө зөнч Мухаммедын үр сад хэмээн зарлаж, Ибрагим нэртэй“халиф” буюу хаанаар өргөмжилсөн юм. АНУ-ын Сенатын гишүүн Н.Маккейн 2013 онд Сирийн нутагт нууцаар нэвтэрч, тус улсын сөрөг хүчний төлөөлөгчид, тухайлбал, Абу Бакр аль-Багдадитай уулзаж байсныг илтгэх гэрэл зураг байдаг аж. Энэхүү уулзалтын дараа Э.Маккейн аядуу үзэлтэй гэх сөрөг хүчнийхэнд тусламж үзүүлэхийг уриалж, АНУ Төрийн департаментын шугамаар тусламж үзүүлсэн юм. Харин энэхүү уулзалт болохын өмнөхөн“Исламын улс” бүлэглэлийн тэргүүн Абу Бакр аль-Багдади Ирак дахь Таж, Абу Грейб шорон руу дайралт зохион байгуулж, 1000 орчим алан хядагчийг оргон зайлахад тусалсан гэдгээ мэдэгдсэн байна. Үүнээс гадна уг дайралттай бараг нэгэн зэрэг найман өөр улсад орших шоронгуудад зэвсэгт дайчид халдаж, тэндээс оргуулсан алан хядагчдын олонхи нь Сирийн иргэний дайнд оролцохоор мордсон юм.

Д.Болд