Өглөө.мн Шинэ өглөө, Шинэ мэдээлэл
“Морьд эргэлээ…” гэж Монголчууд ярьдаг. Үүгээр сайн уяачийн ямар зүсний шандаст хурдан хүлэг түрүүлэн ирэх бол гэж сэтгэл догдлон хүлээдэг. Түүн шиг монголчууд МАН–ын XXVIII Их хурлын үйл явдлыг анхааралтай ажиглалаа. Эрх баригч намын энэ хурлаар хэн МАН–ын дарга болох, цаашлаад МАН–ын бусад удирдлагуудад хэн сонгогдохоос хамааран засаг төрийн тогтвортой байдал, улс орны ойрын хөгжлийн ирээдүй тодорхойлогдох байлаа. Ямартай ч МАН–ын XXVIII Их хурлын 1300 орчим төлөөлөгчийн олонхи нь намын даргаараа Ерөнхий сайд У.Хүрэлсүхийг дэмжиж сонголоо. МАН–ын 200 мянга гаруй гишүүнийг төлөөлж ирсэн Их хурлын төлөөлөгчдийн олонхи нь МАН–ыг шинэ хүнээр, шинэ бодлогоор удирдуулахыг илүүд үзсэн үү гэлтэй.
Ерөнхий сайд У.Хүрэлсүхийн нэрийг МАН–ын даргад ХЗДХ-ийн сайд Ц.Нямдорж дэвшүүлсэн бол МАН–ын дарга болсныхоо дараа хийсэн МАН–ын бага хурлыг МАН–ын дарга У.Хүрэлсүх туршлагатай парламентч Ц.Нямдоржоор удирдуулсан нь ахмад залуу үеийн төлөөллүүд сэтгэл, итгэл нэгтэйгээр хамтран ажиллана гэдгийг илэрхийлсэн үйл хэрэг боллоо. МАН–ын бага хурлаас намын Ерөнхий нарийн бичгийн даргыг сонгох дүрмийн дагуу намын дарга У.Хүрэлсүх өмнөх ЕНБД Д.Амарбаясгаланг үргэлжлүүлэн ажиллуулах саналыг оруулсан байна. Д.Амарбаясгалан даргын хувьд 2012-2016 онд НИТХ–ын төлөөлөгчөөр ажиллахдаа тухайн баг үед эрх баригч байсан Нийслэлийн АН-ын буруу бодлогод шүүмжлэлтэй хандаж, улмаар 2016 оны НИТХ–ын сонгуульд МАН олонхи болоход чухал үүрэг гүйцэтгэсэн намын шилдэг залуу лидерийн нэг юм.
Энэ удаад тэрээр МАН–ын ЕНБД–ын сонгуульд, заалнаас нэр дэвшсэн Сүхбаатар дүүргийн засаг дарга асан Б.Баярмагнайтай өрсөлдөн Бага хурлын гишүүдийн 74.5 буюу үнэмлэхүй олонхийн дэмжлэгийг авч сонгогдсон байна. Ийнхүү Д.Амарбаясгалан олонхийн дэмжлэгийг авч МАН–ын ЕНБД-аар сонгогдон, МАН–ын “гал тогоо”-г үргэлжлүүлэн удирдах болсныг нэг талаас Ерөнхий сайд, МАН–ын шинэ дарга У.Хүрэлсүхтэй гар нийлэн ажиллаж чадах хүн гэж МАН–ын бага хурлын гишүүд үзэж байгаа, нөгөө талаас олон нийтийн зүгээс МАН–ыг залуучууд удирдан авч явахыг дэмжиж байгаагийн илэрхийлэл гэж харж болохоор байна. “Морьд эргэлээ…” гэдэг шиг МАН–ын XXVIII Их хурлаар МАН-д өөрчлөлтийн салхи сэвэлзэж, үүний үр дүнд бүрдсэн залуучуудын баг төрийн хэмжээнд бугшсан албан тушаалын наймаалцал, авлигын торыг сэтлэн улс орон хөгжил дэвшил рүү хандах чиглэл тогтлоо гэж ажиглагчид, иргэд олон нийт ам сайтай байна.
