Өглөө.мн Шинэ өглөө, Шинэ мэдээлэл
Гадаад харилцааны сайд Н.Энхтайван 2020 оны 7 дугаар сарын 30-ны өдөр Их Британи, Умард Ирландын Нэгдсэн Хаант Улсаас Монгол Улсад суугаа Элчин сайд Филип Малоуныг хүлээн авч уулзав.
Элчин сайд Ф.Малоун Монгол Улсын Гадаад харилцааны сайдаар томилогдсонд баяр хүргэж, хоёр улсын найрсаг харилцаа, хамтын ажиллагааг өргөжүүлэн бэхжүүлэхийн төлөө хамтран ажиллахаа илэрхийлэв.
Уулзалтаар сайд Н.Энхтайван Ковид-19 цар тахлаас үүссэн шинэ нөхцөл, байдалд тохируулан Их Британид оршин сууж буй монгол иргэдэд зохих дэмжлэг үзүүлж байгаад талархал илэрхийлээд цаашид үргэлжлүүлэн тусалж, дэмжихийг хүсэв.
Монгол, Их Британийн харилцаа, хамтын ажиллагааг эдийн засгийн агуулгаар баяжуулах, худалдааг нэмэгдүүлэх, олон улсын чанар, стандарт нийцсэн экспортын бараа бүтээгдэхүүнийг Монголд үйлдвэрлэхэд Их Британийн хөрөнгө оруулалтыг татах зэрэг харилцан сонирхсон асуудлаар санал солилцов.
