А.Мөрөн: Онгоцны буудалд буухад багийн эзэн өөрөө тосч авсан

 Хөлбөмбөг хэмээх спорт дэлхий нийтэд хүлээн зөвшөөрөгдөж, хүн төрөлхтний ¹1 спорт гэгдэх болсон. Тэгвэл Монголын анхны мэргэжлийн хөлбөмбөгчин “Краби ФЦ” багийн довтлогч А.Мөрөнтэй ярилцлаа. 

-Мэргэжлийн хөлбөмбөгчин бол­­сонд тань баяр хүргэе. Энэ спортод хөл тавьсан үеэ дур­сахгүй юу?

-Тэр үед хөлбөмбөгийн баг, клубууд их цөөхөн байсан. Бусад хүүхдүүдийн л адил гудамжиндаа тоглож өссөн дөө. Би Дамбадаржаад өссөн болохоор тэндээ л тоглодог байсан. Харин 2000 оны УИХ-ын сонгуульд манай тойргоос нэр дэвшсэн Д.Мөрөн гэж хүн хөлбөмбөгийн талбай байгуулж өгсөн. Гэхдээ яг тэр үед нь би мэдээгүй юм. Гэтэл манай нэг найз “Манай энд хөлбөмбөгийн талбай байгуулагдчихаж” гэж хэлсэн.

Тэр мэдээг сонсоод есдүгээр сарын 1-нд хичээлийн шинэ жилээр өмсөх гэж байсан шинэ пүүзээ аваад л тийшээ очиж байлаа. Ер нь тэнд л тоглоно. Өглөө 10:00 цагт гараад, оройн 22:00 цагт гэртээ ордог байлаа. Бараг л тэр талбайд амьдарч байсан гэхэд хилсдэхгүй. Тэнд миний бага нас өнгөрсөн гэж болно.

Харин дараа нь тавдугаар сургуулийн Ч.Шархүү багшийн секцэнд орж, тэнд бэлтгэл хийдэг болсон. Багш маань миний хувьд хамгийн сайн мэргэжлийн багш байж чадсан. Жинхэнэ хөл­бөм­бөгчин хүний эзэмших ёс­той техник, арга барил гээд л бүх­нийг зааж сургасан.

-Хүүхэд бүр л багадаа хөл­­бөмбөг тоглодог. Гэхдээ мэргэж­лийн хэмжээнд хүртэл явсан нь цөөхөн. Энэ спорттой амьдралаа холбоход юу нө­лөөлсөн бол?

-Хөлбөмбөг бол гайхалтай спорт. Багадаа гудамжиндаа тог­лож байхдаа хөлбөмбөгчдийг дуу­риаж чулуу тавьж байгаа сүлжиж гүйдэг байлаа. Дамбын талбай дээрээ тоглох үедээ тэр хавийнхаа хүүхдүүдийн дунд нэртэй болж эхэлсэн. А.Мөрөн ёстой мундаг, манай баг авна гэх зэргээр тэр хавьдаа л үнэд ордог байлаа.

Хөл­бөмбөг өөрөө багийн спорт учраас найз олонтой болно. Тэгээд ч би хөлбөмбөг тоглож байхдаа өө­рийнхөөрөө байгаагаа мэдэрдэг. Тайван, аз жаргалтай болдог гэх үү дээ. Ер нь энэ спорт намайг тат­сан гэж болно.

 -Одоо хүчин зүтгэх гэж байгаа “Краби ФЦ” багийнхаа талаар товч танилцуулахгүй юу?

-Манай баг 2009 онд байгуу­лагд­сан, Краби гээд хотынхоо нэрээр нэрлэгдсэн баг байгаа. Байгуулагдсанаасаа хойш лигтээ маш амжилттай тоглож, одоо нэгдүгээр зэрэглэлд орсон. Надаас гадна Нигерь, Бразил болон Япон гээд ерөнхийдөө легионер олонтой мэргэжлийн баг. Мөн энэ жилээс “Тай пример лиг” буюу улсынхаа дээд лигт дэвшин тоглох гэж байна.

-Та ч мэргэжлийн хөлбөм­бөг­чин болчихлоо. Гэхдээ хүний шүтээн гэдэг хэзээ ч хувиршгүй зүйл. Мон­голоосоо болон дэлхийн шү­тээн болсон тамирчдаас хэнийг нь бишрэн шүтэж, үлгэр дуурайл авдаг вэ?

-Монголоос гэвэл Д.Лхүм­бэн­­гарав, Г.Даваа-Очир, Б.Гарьдмаг­­най зэрэг мундаг ах нар байна. Харин үлгэр дуу­райл авдаг, түүн шиг болохыг хүсдэг хүн гэвэл Ро­нал­дино. Тэр бол миний баатар. Би бага байхаасаа л түүний хийдэг хууралт, техник, хөдөлгөөн бүрийг нь сурах гэж дуурайдаг байлаа.

 -Хөлбөмбөгийн ертөнцийг тойр­сон элдэв сенсациудын хам­гийн топ нь хэзээд со­лилцоо най­маа, үнэ ханш бай­­даг. Тиймээс “Краби ФЦ” баг­тай хий­сэн таны гэрээний дүнг хүмүүс бас сонирхож байгаа байх. Нууц биш бол хэдэн төгрө­гийн гэрээ хийсэн бэ?

-Гэрээ болон цалингийн асуу­дал нууц гэж болно. Гэхдээ цалин­гаас гадна бэлтгэлийн бонус гэж мөнгө авдаг.

Өдөрт 500 бат буюу манайхаар долоо хоногт 160 мянган төгрөг болдог. Ойр зуурын хэрэглээний мөнгө гэх юм уу даа. Мөн оруулсан гоолын бонус, сайн тоглосны бонус ч авна. Түүнчлэн тухайн тоглогчийн жерси буюу тоглолтын хувцасны  бор­луу­лалт их байвал 10 хувийг нь авдаг.

-Байрлалын хувьд хаана тог­лож байгаа вэ?

-Би багтаа 12 дугаартайгаар довтлогчийн байрлалд тоглож бай­гаа. Хэд хэдэн туршилтын тог­лолтод довтолгоонд тоглосон. Уг нь миний хувьд хоёр жигүүрээр тоглодог. Гэхдээ ерөөсөө жигүүрт гаргаагүй.

-Багийнхны хувьд шинэ тамир­­чин нь монгол хүн гэхээр сонин байсан байх. Ер нь шинэ хамт олон хэрхэн хү­лээж авсан бэ?

-Их сайхан хүлээж авсан. Тэр ч бүү хэл шигшээ багийн тамирчин гэдэг үүднээс  онгоц­ны буудалд буухад багийн эзэн өөрөө тосч авсан. Таиландчууд их найр­саг хүмүүс болохоор багийн­хан маань их халуун дотноор хү­лээж авсан. Олон ч найзтай болж байгаа.

Харин монгол хүн гэдгийг эх оронд нь хөлбөмбөг өндөр хөгжсөн тэд нэг их тоогоогүй.

-Таиландын лиг ер нь хэдийд эхэлдэг юм бол. Бэлтгэл хэр байгаа вэ?

-Лиг хоёрдугаар сарын 21-нээс эхэлнэ. Бэлтгэл хотдоо биш, Банг­кокоос хоёр цаг явж хүрдэг бэлтгэлийн баазад болно гэсэн. Одоо очоод л бэлтгэлдээ орно доо.

-Сүүлийн жилүүдэд манай­хан хөлбөмбөгийг нэлээд со­нир­­хож байна. Хүүхдүүд ч багаасаа хөл­бөм­бөгөөр шимтэн хичээллэх болж. Тэдэнд юу гэж зөвлөх вэ?

-Энэ нь надад маш сайхан санагдаж байна. Харин эх­нээс нь л зөв сурах ёстой. Хөл­бөм­бөг тоглож байгаа ба­га­­­чууд­даа захиж хэлэхэд өөрийгөө хөгжүүлэх бэлтгэл, сургуулилтыг байнга хийж байх хэрэг­тэй. Цаг гарвал техникээ дав­таж, хур болон хүч­ний бэлт­гэлийг тууштай хийх нь чухал. Ерөөсөө залхуурч болохг­­үй. Супер од Роналдино хүр­тэл одоо ч гэсэн өөрийгөө сайж­руулахын төлөө ажилласаар л байна.

Миний хувьд өмнө нь хичээлдээ явна, бэлтгэлээ хий­нэ гээд хэцүү байсан. Ха­рин одоо бол зөвхөн бэлтгэл, сургуулилт, хөлбөмбөгтөө өө­рийгөө бүрэн зориулж байна. Би “Хөдөлмөр хүнийг хэзээ ч гомдоохгүй” гэдэг үгийг хэлэх дуртай. Тиймээс мөрөөдлөө хэзээ ч орхихгүй.