Өглөө.мн Шинэ өглөө, Шинэ мэдээлэл
УИХ-ын гишүүн Г.Уянга Монгол Улсын Ерөнхийлөгчийг болон Монгол Улсын сайд, ЗГХЭГ-ын дарга С.Баярцогтыг огцруулах асуудлыг хөндөнө гэдгээ удаа дараа мэдэгдээд буй.
Тэрбээр “Битүүний өдөр тавын даваа эхэлчихсэн, УИХ-ын гишүүд IPAD дээрээ бөх үзээд сууж байсан ийм үйл явц дунд их олон гишүүн халамцуу байсан. Та нар бүгдээрээ харсан. Дараа нь шүүмжлэлүүд явж байсан. Ийм үеэр Ашигт малтмалын хууль, Урт нэртэй хууль, Засгийн газрын гишүүнийг огцруулах асуудал гээд олон чухал асуудлыг хэлэлцэж кнопдож, Их хурал шийдвэрлэсэн. Бид энэ асуудлуудыг олон нийтийн анхаарлаас хөндийрүүлж шийдвэрлэж болохгүй ээ, хэлэлцүүлгийн явц олон нийтэд нээлттэй байх ёстой гэдэг байр суурьтай байсан. Тэгээд 18.00 цаг гээд ажлын цаг дуусмагц мэдэгдэл хийж, чуулганы танхимыг орхиж явсан. Яг энэ үеэр асуудал оруулсан гишүүдийг нь байхгүй байхад асуудлыг хэлэлцүүлж шийдвэрлэсэн. Бид С.Баярцогт сайдын асуудлыг дахин өргөн барина.
Хэдийгээр бидний тавьсан асуудлыг олонхоороо хүч түрэн шийдээд С.Баярцогтын асуудлыг авч үлдсэн боловч бид нэгдүгээрт дахин С.Баярцогтын асуудлыг хөндөж тавина. Хоёрдугаарт, 17.5 тэрбум төгрөгтэй холбоотой Оюутолгойд өгөх зөвлөгөөний асуудал цаашаа улам хөврөх болно. Энэ хаашаа чиглэж хөврөхийг бид мэдэхгүй. Асуудлуудыг дэс дараатайгаар баримттайгаар тавих болно. Ашигт малтмалын хуулийн 5.3, 5.4, 5.5 дахь заалт бол Үндсэн хуулийн 6.1 дэх заалтыг баталгаажуулсан ийм заалт байгаа юм. 6.1 бол Монгол Улсын газрын хэвлий, түүний доорх баялаг, ой, ан амьтан, ус, ургамал бүгд гагцхүү ард түмний өмч бөгөөд төрийн хамгаалалтанд байна гэсэн байгаа. Энэ эзэн нь ард түмэн. Төр түүнийг хамгаалах үүрэгтэй гэсэн заалт. Үүнийг баталгаажуулж Ашигт малтмалын хуульд Монгол улсын иргэд төрөөрөө дамжуулж хувь эзэмшихээр заасан юм. Гэтэл энэ хувийг үгүй болгоно гэдэг заалт өөрөө Үндсэн хуулийг зөрчиж байгаа. Энэ асуудлыг Үндсэн Хуулийн Цэцэд тавина гэж бодож байна” гэж мэдэгдсэн.
Мөн “Ерөнхийлөгчийн удаа дараа үйлдэж байгаа хууль зөрчсөн үйлдлийг таслан зогсоох эрх Монгол Улсын Их Хурал байгаа” гэдгийг сануулаад хэрвээ Монгол Улсын хуулийг зөрчин гадны ерөнхийлөгчийн хүсэлтээр иргэнийг нь өршөөж уучилж болж байгаа бол Монголын ард иргэдийнхээ хүсэлтийг сонсож, Ц.Мөнхбаяр гэдэг хүнд уучлал үзүүлэх байхаа гэж найдаж байна” гэсэн хүсэлт гаргасан.
Тэгвэл энэ удаад Монгол банктай холбоотой нэгэн ноцтой баримтыг дэлгэлээ.
Энэ бол Монгол банкны Ерөнхийлөгчийн тушаалаар их хэмжээгээр буцалтгүй тусламж шилжүүлсэн гэх баримт.
“Монгол банкны ерөнхийлөгчийн тушаалаар С.Болдод 180 сая төгрөгийн буцалтгүй тусламж, Д.Чимэд-Юндэнд 90 сая, Х.Дэлгэр, Д.Ганбат нарт 139 сая 500 мянга……гэх мэтээр зөвхөн ганц хуудас баримтаас харахад 3 тэрбум 700 сая төгрөгийн буцалтгүй тусламж шилжүүлсэн баримт. Мөн гэрээ дүгнэсэн актын дагуу 10 сэтгүүлчийн Сөүл явах томилолтын урьдчилгаа…..гэх мэт….” гэж өөрийн цахим хуудсаар дамжуулан баримт дэлгэжээ.
Мөн тэрбээр Монгол банкны Ерөнхийлөгч Н.Золжаргалд хандан хуулийн дагуу мэдээлэл гаргуулж авах хүсэлт, албан бичиг илгээсэн байна.
Буцалтгүй тусламж авсан гэх эдгээр эрхмүүдэд яг ямар үндэслэл, нөхцлөөр тусламж олгосон бэ? гэдгийг Авлигатай тэмцэх газар болон холбогдох байгууллага шалгаад ард иргэдэд хариултыг нь хэлэхийг хүлээж суух хэрэгтэй болох нь.
Г.Эрдэм
