Өглөө.мн Шинэ өглөө, Шинэ мэдээлэл
Одоогоос 3 жилийн өмнө Монгол улсын Ерөнхийлөгч Ц.Элбэгдорж УИХ-ын чуулганы индэр дээрээс хэлсэн үгэндээ “цагдаагийн хөрөнгөлөг хурандаа нарын талаар хууль бусаар баяжиж буй тухай ард түмний дунд янз бүрийн яриа байдаг, энэ ярианы үнэн худлыг олохын тулд цагдаагийн хөрөнгөлөг хурандаа нарыг шалгах шаардлагатай…, Хууль бусаар гэнэт их хөрөнгөжсөн тийм хүмүүсийн асуудлыг би энд хөндөж байна. Тэд хуулийг хэрэгжүүлэх үүрэгтэй атлаа хуулийг зөрчдөг, шударга ёсыг сахиулах томилгоотой, тийм тангарагтай мөртлөө шударга бусыг хийдэг. Төсөв нь алдагдалтай төрөөс цалин авч, хувцас өмсөж, албан тушаалын зарим хангалт авдаг мөртлөө мөнгө хөрөнгө нь бялхсан, багтаж ядсан байдаг тухай би сонссон. Зөвхөн би ч биш энэ тухай өнөөдөр Монгол сонсож байна. Итгэсэн ардынхаа элэг рүү ингэж өшиглөж болохгүй. Хууль завхруулдаг хууль сахиулагчид байж болохгүй” гэж анх удаа төрийн нэр, албан тушаалаа ашиглаж “баяжсан” хурандаа нарт шүүмжлэлттэй хандсан. Үүний дараагаар цөөнгүй хурандаа нарыг АТГ шалгаж, албан тушаалаас нь чөлөөлсөн байдаг. Ингэж хөрөнгөлөг хурандаа нарыг чөлөөлөх явцад тухайн үеийн Хууль зүйн сайд Х.Тэмүүжинд сүрдүүлэг ирж байсан удаатай.
