Баруун бүсийн Жүдогийн ордны шав тавилаа

Хаврын билэгт сайн өдөр аймгийн Спортын төв ордны дээд талын хэсэгт Баруун бүсийн Жүдогийн ордны шав тавих ёслол 2015 оны 03 дугаар сарын 25-ны өдөр болов.
Ёслолын үйл ажиллагаанд аймгийн Засаг дарга, Баруун бүсийн зөвлөлийн дарга Д.Цэвээнравдан, МУ-ын жүдо бөхийн холбооны тэргүүн дэд ерөнхийлөгч, Ховд аймгийн хөгжлийн төлөө сангийн тэргүүн Ш.Адьшаа, ИТХ-ын Нарийн бичгийн дарга Н.Бөхболд, аймгийн Засаг даргын Нийгмийн хөгжлийн асуудал хариуцсан орлогч Ч.Чинбат, аймгийн Ерөнхий аудитор Л.Галбадрах, Жаргалант сумын Засаг дарга Д.Баасандорж, Жаргалант сумын Засаг даргын орлогч Б.Батсүх болон спортын ордны багш, дасгалжуулагч , жүдогоор хичээллэдэг хүүхдүүд болон иргэд оролцоо.
Жудогийн ордны шав тавих ёслолын үйл ажиллагааг нээн аймгийн Засаг дарга Д.Цэвээнравдан : Олон үндэстэн ястны өлгий нутаг , баруун бүсийн төв Ховд хотод өнөөдрийн билэгт сайн өдөр нэгэн сайхан бүтээн байгуулалтын шав тавих ёслол болж байна. Жүдогийн багш, дасгалжуулагч олон шавь нарын хүсэл болсон энэхүү бүтээн байгуулалтыг МУ-ын Жүдо бөхийн холбооны Ховд аймгийн Хөгжлийн төлөө сангийн тэргүүн Ш.Адьшаагийн хичээл зүтгэл, санаачлагаар Япон улсын “Соёлын өвсний үндэс” хөтөлбөрийн тусламжаар ийнхүү баруун бүсийн Жүдогийн ордон барих болсон нь бахархмаар сайхан үйл явдал мөн билээ. Жүдо бөх бол Монголчуудыг дэлхий нийтэд сурталчилж буй төрөл юм. Энэхүү ордон баригдсанаар Монголын тэр дундаа Ховд аймгаас маань тив дэлхийд нэрээ гаргасан олон алдартай тамирчин гарна гэдэгт итгэлтэй байгаагаа илэрхийлэв.
Баруун бүсийн Жүдогийн ордныг барихад Япон Улсын Засгийн газраас 92.278 ам.долларын буцалтгүй тусламжийг олгож байгаа юм. Жүдо бөхийн бэлтгэлийн ордныг нэг давхар 362.39 мкв талбайтай байхаар төлөвлөжээ.
Ордны барилгын ажлыг Ховд аймгийн “Хатан түнгэл” компани гүйцэтгэж энэ жилдээ багтааж ашиглалтад оруулахаар болсон байна
Энэ төсөл нь Монголд “Соёлын өвсний үндэс” буцалтгүй тусламжийн хүрээнд хэрэгжиж буй тав дахь төсөл юм.