Өглөө.мн Шинэ өглөө, Шинэ мэдээлэл
Өчигдөр нийслэлд гал түймрийн 2, орон нутагт гал түймрийн 1 дуудлагатай байсан байна.
Баянгол дүүргийн 23 дугаар хороо, Зүүн Ард Аюушийн 11 дүгээр гудамжийн 325 тоотод иргэн З-н 4 ханатай гэр шатаж байна гэсэн дуудлагыг 2015.08.28-ны өдрийн 06:08 цагт хүлээн авч Гал унтраах, аврах 10 дугаар ангийн 7 албан хаагч, 2 техник хэрэгсэлтэйгээр ажиллаж унтраасан байна. Уг галд иргэн Г /47 настай, эмэгтэй/ өртөж нас барсан байсныг дүүргийн Цагдаагийн хэлтсийн бүрэлдэхүүнд хүлээлгэн өгчээ.
Мөн Баянгол дүүргийн 18 дугаар хороо, 4 дүгээр хорооллын 43 дугаар байрны 5 давхрын тагтан дээр иргэн Б-н эд хогшил шатаж байна гэсэн дуудлагыг 2015.08.27-ны өдрийн 21:56 цагт хүлээн авч Гал унтраах, аврах 10 дугаар ангийн 7 албан хаагч, Дархан-Уул аймгийн Шарын гол сумын Хайрхан багийн 12 дугаар байрны урд талд И-н Eхсел загварын машин шатаж байна гэсэн дуудлагыг 2015.08.27-ны өдрийн 17:59 цагт хүлээн авч Гал унтраах, аврах 55 дугаар ангийн 4 албан хаагч ажиллаж унтраажээ.
Тэгвэл өдгөө Завхан, Хөвсгөл аймгуудад ой хээрийн түймэртэй байна.
Завхан аймгийн Баянтэс сумын Жавхлант багийн “Өвөр-Хөндий” гэдэг газар /Монгол улсын хилийн 253 дугаар баганын орчим/ ОХУ-аас ойн түймэр орж ирсэн тухай мэдээллийг 2015.08.27-ны өдрийн 09:50 цагт хүлээн авч тус аймгийн Онцгой байдлын газрын 12 албан хаагч, Хилийн 0277 дугаар ангийн 41 албан хаагч, орон нутгийн 27 иргэн, нийт 80 хүн, 4 техник хэрэгсэлтэйгээр;
Хөвсгөл аймгийн Ренчинлхүмбэ сумын Хоолойн зах багийн “ Хар давааны ам” гэдэг газар /Цагаан-Нуур сумын төвөөс зүүн зүгт 40 км-т/ ойн түймэр гарсан тухай дуудлагыг 2015.08.27-ний өдрийн 09:30 цагт хүлээн авч тус аймгийн Онцгой байдлын газрын 12 албан хаагч, орон нутгийн 16 иргэн нийт 28 хүн, 9 техник хэрэгсэлтэйгээр тус тус ажиллаж байна.
