Өглөө.мн Шинэ өглөө, Шинэ мэдээлэл
Монгол Улсын Их Хурлын дэд дарга Л.Цог өнөөдөр /2015.09.17/ Европын аюулгүй байдал, хамтын ажиллагааны байгууллагын Парламентын Ассамблейн 2015 намрын хуралд оролцож буй Оросын Холбооны Улсын Холбооны Хурлын Төрийн Думын гишүүн Андрей Климовыг авч уулзав.
Уулзалтын эхэнд Улсын Их Хурлын дэд дарга Л.Цог Монгол Улсын нийслэл Улаанбаатар хотноо зохион байгуулагдаж буй Европын аюулгүй байдал, хамтын ажиллагааны байгууллагын Парламентын Ассамблейн 2015 намрын хуралд оролцохоор хүрэлцэн ирсэнд талархал илэрхийллээ.
Оросын Холбооны Улсын Холбооны Хурлын Төрийн Думын гишүүн Андрей Климов, Монгол Улс энэхүү хурлыг өндөр, дээд хэмжээнд зохион байгуулж байгааг онцлон тэмдэглэн хэлэв. Уулзалтын үеэр УИХ-ын дэд дарга Л.Цог Монгол Улсын улс төр, нийгмийн талаар товч мэдээлэл өгч, парламентад суудалтай намуудын хамтын ажиллагааны талаар ярилцаж, харилцан санал солилцлоо хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
