Өглөө.мн Шинэ өглөө, Шинэ мэдээлэл
Монгол Улсын нийслэл Улаанбаатар хотноо зохион байгуулагдаж буй Европын аюулгүй байдал, хамтын ажиллагааны байгууллагын парламентын Ассамблейн намрын хурал өнөөдөр /2015.09.17/ хоёр дахь өдрөө үргэлжилж байна.
Хуралдаан ЕАБХАБ-ын бүс нутаг болон олон улсын түвшин дэх аюулгүй байдлын сорилт бэрхшээлүүдийг хэлэлцэх нь: бүс нутгийн хамтын ажиллагааг бэхжүүлэхэд парламентчдын гүйцэтгэх үүрэг” сэдвээр үргэлжиллээ. Хэлэлцэж байгаа асуудалтай холбогдуулан хурлын төлөөлөгчид Европын холбооны бусад улс орнууд болон өөрсдийн оронд тулгамдаж байгаа, санаа зовоож буй асуудлын талаар саналаа хэлж, асуулт хариулт явагдлаа.
Хуралдаан ЕАБХАБ-ын парламентын Ассамблейн байнгын хорооны хуралдаанаар үргэлжилсэн юм. Байнгын хорооны хуралдааны эхэнд ЕАБХАБ-ын парламентын Ассамблейн Санхүүгийн асуудал эрхэлсэн дарга Доррис Барнетт санхүүгийн тайлангаа танилцуулаа. Тэрээр танилцуулгадаа ЕАБХАБ-ын парламентын Ассамблей цаг хугацаандаа төсвөө баталсан. Дотоод дүрэм, журмаа нягт нямбай биелүүлж, санхүүгийн асуудал ил тод, тунгалаг явагдаж байгаа гэлээ.
Мөн хурлаар ЕАБХАБ-ын парламентын Ассамблейн Ерөнхий нарийн бичгийн дарга Спенсер Оливер тайлангаа танилцуулсан юм. Тэрээр, юуны өмнө өнөөдрийн хурлыг маш өндөр, дээд хэмжээнд зохион байгуулж байгаа Монгол Улсад талархал илэрхийлье гэлээ. Спенсер Оливер ЕАБХАБ-ын Хельсинкийн+40 төслийн талаар мэдээлэл өгсөн юм. 2012 оны Дублин хотноо болсон ЕАБХАБ-ын Сайд нарын зөвлөлийн хурлаар Хельсинкийн+40 үйл явцын тухай шийдвэр баталснаар үйл явц эхэлсэн байна. 2012-2015 оны байгууллагын гурвалсан удирдлага болох Украйн-Швейцарь-Серби нарт байгууллагын шинэчлэлийн үйл явцыг эхлүүлж, байгууллагын түүхэн 40 жилийн ойн бэлтгэлийг хангаж ажиллах чиглэл өгсөн байна. Энэ чиглэлээр бэлтгэл ханган ажиллаж байгааг тэрээр хэллээ.
Мөн хуралдаанаар ЕАБХАБ-ын парламентын Ассамблейн хөтөлбөрүүдийн талаар хэлэлцэв. Энэ жил Сонгуулийн үр дүнгийн талаар ажиглалт хийхээр төлөвлөсөн байна. Тухайлбал, Бүгд Найрамдах Кыргызстан Улсын парламентын сонгууль, Бүгд Найрамдах Беларусь Улсын Ерөнхийлөгчийн сонгууль, Бүгд Найрамдах Турк Улсын парламентын сонгуулийн үеэр ажиглалт хийхээр бүлгийн дарга нарыг томилсон байна.Байнгын хорооны хуралдааны төгсгөлд Шинэтгэл, ил тод байдлын талаар түр хороо байгуулах асуудал болон бусад асуудлын талаар хэлэлцсэн юм.
