А.Баярцэцэг “Miss Earth”-ээс хоёр медаль хүртжээ

Миссийн тэмцээнүүд дотроо чансаагаараа эхний байруудад бичигддэг тэмцээн бол “Miss Earth” билээ. “Miss World”, “Miss International”, “Miss Universe” зэрэг тэмцээнүүдийн нэгэн адил “Miss Earth” гоо бүсгүй шалгаруулах хамгийн том тэмцээнүүдийн нэг бөгөөд уг тэмцээнд Монгол орноо төлөөлөн оролцсон мисс А.Баярцэцэг амжилттай оролцож, хоёр медаль хүртжээ. Багагүй хугацаанд өрнөдөг энэхүү тэмцээнд тэрбээр өнгөрөгч 11 дүгээр сарын 21-ний орой болсон “Үдшийн даашинз” шалгаруулалтад түрүүлж алтан медаль хүртжээ. Харин 11 дүгээр сарын 27-ны “Коктайл даашинз” шалгаруулалтад хүрэл медаль хүртэж, үндсэн дүнгээр “Miss Earth” тэмцээнд зургадугаар байр эзэлжээ.

Гэхдээ тэмцээний журам ёсоор зургадугаар байрыг А.Баярцэцэг ганцаараа эзлээгүй бөгөөд дөрвөн эмэгтэй эзэлсний нэг нь болжээ. Тодруулбал, Чили, Хорват, Монгол, Оросын бүсгүйчүүдийг зургадугаар байрт оржээ. Үүнээс гадна энэ удаагийн буюу “Miss Earth 2015” тэмцээнд Монголын талаас оролцсон мисс А.Баярцэцэгийн танилцуулах видео тэмцээний зохион байгуулагчдаас өндөр үнэлэлт авсан юм.

Э.Төгс