Анкара хотын дэлбэрэлтэнд Монгол хүн өртөөгүй

Туркийн Анкара хотод энэ сарын 17-ны өдрийн 20:30 цагийн орчимд тус улсын парламентын ордны ойролцоо автобусанд байрлуулсан тэсрэх бөмбөг дэлбэрсний улмаас 28 хүн амиа алдаж, 61 хүн шархадсан. Уг халдлагад Анкара хотод суралцдаг Монгол залуу өртөх дөхсөн байна. Эх сурвалжийн мэдээлснээр тэрээр дэлбэрэлт болсон газрын ойролцоо байсан бөгөөд тэсрэлтийн долгионд цохигдон газар унасан тухайгаа ярьжээ.

Энэ тухай Элчин сайдын яамнаас мэдээлэхдээ “Тус улсын эрх баригчид уг дэлбэрэлтийг террорист халдлага хэмээн үзэж байгаа бөгөөд одоогоор дэлбэрэлтийн хариуцлагыг аль нэг террорист бүлэглэл хүлээгээгүй байна. Дэлбэрэлтийн улмаас амиа алдсан, гэмтсэн хүмүүсийн дунд Монгол улсын иргэд байхгүй” гэсэн байна.