Ерөнхийлөгч Ц.Элбэгдорж МАХН-ын дарга Н.Энхбаярт уучлал үзүүллээ

  Монгол Улсын Ерөнхийлөгч Ц.Элбэгдорж өчигдөр зарлиг гарган хорих 401-р ангид ял эдэлж буй Н.Энхбаярт уучлал үзүүллээ.

Тод­руулбал  тэрбээр өнгөрсөн оны найм­дугаар сард анхан болон давж заалдах шатны шүүхээс дөрвөн жилийн хорих ял сонсч, улмаар арванхоёрдугаар сард Улсын Дээд шүүхээс хорих ялыг 2.6 жил болгосон билээ.

Ингээд  Монгол Улсын Ерөнхийлөгч  Ц.Элбэг­доржийн  зарлигийг  танил­цуу­­лахаар   ШШГЕГ-аас ирсэн төлөөлөгчид  Н.Энхбаярын   шоронжсон өрөөнд орж  ирж  уучлал үзүүлсэн  зарлигийг танилцуулсан юм.
Уг зарлигт, “Монгол Улсын Үндсэн хуулийн 33 дугаар зүйлийн 1 дэх хэс­гийн 8, Монгол Улсын Ерөнхийлөгчийн ту­хай хуу­лийн 15 дугаар зүй­лийн 2, Эрүүгийн хуу­лийн 77 дугаар зүйлийн 77.2 дахь хэсгийг тус тус үндэслэн ЗАРЛИГ БОЛГОХ нь: Шүү­хийн шийдвэр гүйцэтгэх ерөнхий газрын харьяа Хорих 401 дүгээр ангийн ялтан Н.Энхбаярт ууч­лал үзүүлж, үлдэж буй ялаас нь чөлөөлсүгэй” гэжээ.

Ийнхүү сүүлийн үед биеийн байдал нь мууд­сан хэмээн хэвлэлээр ца­цаг­­даад байсан МАХН-ын дарга Н.Энхбаяр Ерөн­­хий­лөгчийн зарлигаар ялаас чөлөөлөгдсөнд олон хүн Ц.Элбэгдоржийг зөв шийд­вэр гаргалаа хэмээн өөр хоо­рондоо ярьж байсан .

Ямартай ч Монгол Улсын Ерөнхийлөгч   уучлал  үзүүлж, ялаас чөлөөлөх ту­­хай зарлиг гаргасны дараа Н.Энхбаярын гэргий О.Цолмон, хүү Э.Батшугар болон МАХН-ын дэд дарга Д.Тэрбишдагва, Эрүүл мэндийн сайд Н.Удвал болон УИХ-ын гишүүн З.Баянсэлэнгэ, О.Баасанхүү нар Клиникийн II нэгдсэн эмнэлэгт хүрэлцэн ирж, Н.Энхбаяртай уулзсан юм. Мөн МАХН-ын гишүүд дэм­­жигчид эмнэлгийн байр­­ны гадаа  цуглаад  бай­­лаа.

Намын гишүүд  дэм­­жиг­чид нь ирсний дараа Н.Энхбаярыг ялаас чө­­лөөлөх шийдвэр гарсны дараа  түүнийг энгийн тасаг руу шилжүүлсэн. Түүний гэр бүлийн хүн одоогоор “Н.Энхбаяр эмнэлгээс гарах ямар ч боломж байхгүй. Учир нь түүний биеийн бай­дал маш хүнд байгаа та­лаар хэвлэлээр гарч байна.
Тиймээс  одоо энэ цаг мөчөөс эхлэн түүнийг нэн яаралтай шижилгээнд хамруулж биеийг нь тэнхрүүлэх шаард­лагатай байна. Тиймээс эмчилгээ хийх тул эндээ үр­гэлж­лүүлэн хэвтэнэ гэж ойл­гож болно” гэсэн юм. Харин эмч нарын хэлж буйгаар Н.Энхбаярын биеийн байдал муу байгаа учраас түүний биеийн байдлыг нь ажиглаж байгаад эмнэлгээс гаргах эсэхийг нь шийднэ гэсэн билээ.

Н.Удвал: Уучлал үзүүлснийг сонсоод шууд ирлээ

Ерөнхийлөгч зарлиг гарган уучлал үзүүлснийг сонсоод шууд наашаа ирлээ.  Ямар ч байсан шоронгоос гарч эмнэлэгт шилжлээ. Ингэснээр  энгийн иргэний адил хаана ч эмчлүүлэх боломжтой болж байна. Энэ хүний амь насыг аврах боломж бүрдэж байгаад л туйлын баяртай байна. Гэнэтийн ийм шийдвэр гарсан нь олон нийтэд улс төрийн тохироо байсан байна гэх хардлага төрүүлээд байх шиг байна. Энэ шийдвэрт улс төрийн ямар нэгэн тохироо огт байхгүй гэдгийг хариуцлагатайгаар мэдэгдэж байна. Угаасаа энэ хүнийг эрүүл мэндийн шалтгаанаар суллах асуудал Ерөнийлөгчийн сонгуулиас өмнө яригдаж байсан.  Тэгэх үндэслэл ч байсан. Одоо цаашдаа гадаадад явж эмчлүүлэх асуудал яригдаж эхлэх байх. Гэхдээ бид Н.Энхбаяр даргыг эмнэлгээс гаргаж гэр рүү нь авч явах болно гэлээ.

О.Баасанхүү: Бид хэзээ ч уучлал гуйж царай алдахгүй

УИХ-ын гишүүн О.Баасанхүүгээс даргынх нь ялаас чөлөөлсөн эсэхийг асуухад   “Өнөөдөр Ерөнхийлөгчийн зүгээс намын даргад уучлал үзүүллээ. Гэхдээ энэ бол баярламаар юм шиг боловч нөгөө талаасаа гунигтай гэж хэлж  болно.  Учир нь Шүүх шинжилгээний үндэсний төвөөс 20 гаруй эмч нарын бүрэлдэхүүнтэй багаас гарсан дүгнэлтэд хоёрдмол утгатай хариу өгсөн. Энэ хариунаас болж прокурорын байгууллага эмч нарын дүгнэлтийг хүлээж аваагүй. Одоогоор прокурорын байгууллагаас 12 эмчээс мэдүүлэг аваад байгаа. Үлдсэн найман эмчээс нь ирэх долоо хоногт мэдээлэл авна. Энэ хооронд хүний амь нас эрүүл мэнд яригдаж байна.

Тиймээс   Ерөн­хий­лөгчийн зүгээс эрүүл мэндийг нь бодоод ууч­лал үзүүл­­сэн байх гэж бодож бай­на. Бид хэзээ ч ууч­лал гуйж царай алдахгүй гэсэн байр суурьтай байгаа” гэв.

З.Баянсэлэнгэ: Даргыг чөлөөлж байгаа нь явдал ямар нэгэн намын тохироо байхгүй

“Даргыг чөлөөлсөн яв­далд ямар нэгэн намуудын хэлцэл байхгүй. Хэрэв тийм байсан бол би Н.Энхбаяр даргыг суллагдах гэж байгаа тухай мэдэх байсан. Манай намынхан энэ шийдвэрт нэг талаас баярлаж байгаа ч хүлээн зөвшөөрөхгүй байна. Н.Энхбаяр гэдэг хүний биеийн байдлыг нь төр хариуцахгүй, ийм хүнд байдалтай болсных нь дараа зөвхөн өөрт нь хариуцуулж үлдээлээ” гэв.
Н.Энхбаярыг сулласны дараа  Клиникийн  II эмнэлгийн гадна олон иргэн Ерөнхийлөгчид баярлаж бай­гаагаа илэрхийлж байв.

Ингээд иргэн Д.Батмөнх хэлэхдээ “Монгол Улсын Ерөнхийлөгч Ц.Элбэгдорж гэнэт Н.Энхбаяр гэдэг хүнд өршөөл үзүүлсэнд мон­голчууд бид маш их баяр­лаж байна. Бид гэртээ сууж зурагт үзэж байгаад энэ тухай мэдээллийг сон­соод Ерөнхийлөгчөө мундаг алсын хараатай хүн байна гэж бодсон шүү.
Арга­гүй л Ерөнхий­лөгчийн зан­гараг гаргаж ард тү­мэндээ өөрийгөө хэн бэ гэд­гийг ха­руулж чадлаа шүү дээ. Тэгээд ч Н.Энхбаярыг эрт­нээс суллах бодол Ерөн­хий­лөгчид байсан байх. Дан ганцаараа ийм шийдвэр гар­гаж чадахгүй байсан уч­раас сая сонгогдохдоо уг зарлигийг яаралтай гаргасан нь тун сайшаалтай. Эцэст нь Ерөнхийлөгчдөө баярлалаа гэж хэлье дээ” гэлээ.

Мөн МАХН-ын гишүүд дэм­жигчид ч Ц.Элбэгдоржид талархаж байгаагаа илэр­хийлж байсан.
Ямартай ч Ерөнхийлөгч Ц.Элбэгдорж МАХН-ын дарга Н.Энхбаярт уучлал үзүүлж чадсанд олон мянган иргэд  баярласнаа илэр­хий­лэн биднээр дайж байсан юм.

Р.Саруул, Х.Нарангэрэл

Эх сурвалж: Өглөөний сонин