Өглөө.мн Шинэ өглөө, Шинэ мэдээлэл
Магадгүй та дээрх гарчгийг уншаад хүчит бөхөөрөө алдартай Увс аймагт бөхчүүд нэр дэвших юм байх гэж андуурах бий. Сонгуулийн хуулиар Увс аймаг 31, 32, 33-р тойрог гэсэн 3 мандаттай. Эндээс 33-р тойрогийг бид онцлон “хүчтэний тойрог” гэж нэрлээд байгаа юм. Ингэж хэлэх нь учиртай. УИХ-ын гишүүн Ч.Хүрэлбаатар УИХ-ын чуулганы хуралдааны үеэр эрх баригч АН-д хандан “…надтай өрсөлдүүлэх “чадалтай” аавын хүү байвал хүрээд ир, өрсөлдөөд өгье” гэсэн.
АН-ын ҮЗХ-ны хурлаар энэ тойрогт Х.Баянмөнх аваргын охин Б.Сүрэнжавыг илгээсэн нь сошл орчинд АН-ын зүгээс Ч.Хүрэлбаатар гишүүний хэлсэн үгийг шууд утгаараа ойлгож “хүчтэн”-ийг илгээлээ хэмээн ярих болсон. Гэвч Б.Сүрэнжав, МАН-аас 2012 онд сонгогдож байсан УИХ-ын гишүүн Ч.Хүрэлбаатартай өрсөлдөөд барахгүй гэдгээ мэдсэн үү, Увс аймгийн АН-ын анхан шатны байгууллагын дэмжлэгийг авч чадаагүйдээ бантсан уу ямартай ч өөрөө өргөдөл гарган нэрээ татахаар болж, түүний оронд аймгийн АН-аас дэмжлэг авсан Увс аймгийн уугуул, “Оюуны Ундраа” группийн үүсгэн байгуулагч, УИХ-ын гишүүн, Онцгой байдлын асуудал эрхэлсэн Монгол улсын сайд асан С.Отгонбаярын нэрийг дэвшүүлэхээр болжээ.
С.Отгонбаярын хувьд аймгийнхаа АН-ын хорооны дэмжлэгийг авсан ч ҮЗХ дээр эмэгтэй гишүүндээ найр тавьж, боломж олгож байсан бол одоо харин эргээд энэ тойрогтоо нэр дэвшин өрсөлдөх нь тодорхой болжээ.
Ийнхүү УИХ-ын сонгуулийн 33-р тойрогт МАН-аас УИХ-ын гишүүн Ч.Хүрэлбаатар, АН-аас “Оюуны Ундраа” группээр “овоглодог”, өмнө нь УИХ-ын гишүүн болон Онцгой сайдлын асуудал эрхэлсэн Монгол улсын сайд асан С.Отгонбаяр нар өрсөлдөх болсоныг ажиглагчид “Увсын хоёр хүчтэн” нэг тойрогт өрсөлдөхөөр “туналаа” гэцгээж байна.
“Надруу хэнийг ч явуулсан шууд өрсөлдөе” хэмээн “том дуугарч” байсан Ч.Хүрэлбаатар гишүүн, “Оюуны Ундраа” группийн үүсгэн байгуулагч, УИХ-ын гишүүн, Төрийн сайдаар ажиллаж байсан С.Отгонбаяртай өрсөлдөх болсноо дуулаад “хулхи нь нэлээд” буусан сурагтай.
Ямартай УИХ-ын сонгуулийн Увс аймгийн 33-р тойрогт ийнхүү “хүчтэнүүдийн тулаан” болох нь нэгэнт тодорхой болжээ.
Ц.Мөнх
