Өчигдөр ОХУ-аас Дархан хотод суугаа ерөнхий консул А.Ц.Доржиев Дархан-Уул аймгийн Засаг дарга С.Насанбаттай албан уулзалт хийв.
Тэрээр уулзалтын эхэнд Улаан-Үүд хотын дарга А.М.Голковоос аймгийн Засаг даргад ирүүлсэн ил захидлыг уламжиллаа. Уг захидалд Дархан-Уул аймгийн Засаг дарга бөгөөд Дархан хотын захирагчаар дахин сонгогдсонд нь чин сэтгэлийн баяр хүргээд, өнгөрсөн хугацаанд Дархан хот болон Улаан-Үүд хотуудын хоорондын хамтын ажиллагаа харилцан ашигтай хөгжсөн. Цаашид Монгол Улсын Дархан-Уул аймаг болон манай хот хоорондын харилцаа улам өргөжин тэлнэ гэдэгт итгэж байгаагаа илэрхийлсэн байна. Мөн Ноён С.Насанбат болон Дархан-Уул аймгийн бүх иргэдэд амжилт, хөгжилт цэцэглэлтийг хүсэн ерөөжээ.
Энэ онд Буриад улсын нийслэл Улаан-Үүд хотын үүсэн байгуулагдсаны 350 жилийн ой тохиож байгаа аж. Буриад улсын нийслэл Улаан-Үүд хот нь орос, буриад, татар, армян, польш зэрэг өөр өөр үндэстэн, шашинтнуудын хооронд амар амгаланг цогцлоон, ард иргэдийг нэгтгэсэн учир Улаан-Үүд хот төдийгүй улс орны түүхэнд ихээхэн ач холбогдолтой өдөр юм. Иймд Улаан-Үүд хотын орон нутгийн засаг захиргааны нэрийн өмнөөс 2016 оны 9 дүгээр сарын 02-03-ны өдрүүдэд тохиох Улаан-Үүд хотын 350 жилийн ойн арга хэмжээнд аймгийн Засаг даргыг болон бусад төлөөлөгчдийг урьлаа. Дээрхи урилгыг аймгийн Засаг дарга С.Насанбат таатай хүлээн авч, Улаан-Үүд хотын ойд хүндэтгэл үзүүлж оролцоно гэв.
http://darkhan.gov.mn/