“Монгол чацаргана” брендийг бий болгоно

Өвөрхангай аймгийн Хархорин сумын нутагт үйл ажиллагаа явуулж буй “Хархорин” ХХК-нь 600 гаруй га талбайд чацаргана тарьжээ. Нийтдээ 65 хүлэмжтэй, жилдээ хоёр сая гаруй суулгацийг гаргаж байна. Тус компанийхан цаашид үйл ажиллагаагаа өргөжүүлж “Хархорин үндэсний цэцэрлэгт хүрээлэн” төслийг хэрэгжүүлэх төлөвлөгөөтэй.

Энэхүү хүрээлэн нь 3000 га чацарганы талбай, 1000 га малын тэжээлийн талбайгаас бүрдэнэ. Чацарганы талбайгаасаа жилд 15-25 мянган тонн жимс хураана. Төслийг хэрэгжүүлснээр хүрэх үр дүнгийн талаар тус компанийн ТУЗ-ын гишүүн П.Учрал ” Эхний ээлжинд чацарганаа боловсруулах хүчин чадалтай тос, констеранцийг хийх үйлдвэрлэл барих юм.

Яагаад энэхүү үйлдвэрлэлийг Хархоринд барих ёстой вэ гэхээр чацаргана өөрөө хүчилтэй, исэлд орох чадвар хурдан байдаг. Тэгэхээр чацарганыг гучин минутаас цагийн дотор боловсруулж чадвал дээд зэргийн бүх амин дэмийг өөртөө агуулсан жинхэнэ чацаргана гарч ирнэ. Чацаргана дуртай газраа ургаад байдаггүй юм. Өвөрмонгол, Сибирь гэх мэт эрс тэс уур амьсгалтай газруудаар ургадаг. Чийглэг уур амьсгалтай газар ургахаар тослог нь байхгүй болчихдог. Бид төслөө хэрэгжүүлснээр зөвхөн Монгол улсдаа биш дэлхийд байхгүй хамгийн том үйлдвэрлэлийн зориулалттай чацаргана тарина гэсэн тооцоог гаргасан. Үүгээрээ дэлхийн зах зээл дээр Монголын брэнд болсон чацарганыг Хархорин чацаргана биш “Монгол чацаргана” брэндийг бий болгоно” хэмээн ярьлаа.

ХХААХҮЯ