Өглөө.мн Шинэ өглөө, Шинэ мэдээлэл
УИХ-ын гишүүн, БОАЖ-ын сайд Д.Оюунхорол Баянзүрх дүүргийн иргэд сонгогчидтойгоо хийх анхны уулзалтаа 8 сарын 23-ны өдөр хийлээ. Уулзалтад тус дүүргийн 1,2,3,7,21,27 дүгээр хорооны иргэд ирсэн юм.
УИХ-ын гишүүн, БОАЖ-ын сайд Д.Оюунхорол тойргийнхоо иргэдтэй уулзах үеэрээ 12 оюутанд 4 жил сурах 120 сая төгрөгийн үнэ бүхий эрхийн бичиг, дунд сургуулийн 200 хүүхдэд цүнх, хичээлийн хэрэглэл гардууллаа.
Тэрээр, уулзалтыг нээж хэлсэн үгэндээ “Ажил амьдралынхаа 25 жилийг холбосон Баянзүрх дүүрэгтээ нэр дэвшиж та бүхнийхээ дэмжлэгтэйгээр УИХ-ын гишүүнээр дөрөв дэхь удаа сонгогдлоо. Итгэж дэмжсэн та бүхэндээ чин сэтгэлийн халуун талархал илэрхийлье. Шинэ Засгийн газар нийгэм эдийн засгийн амаргүй нөхцөлд ажлаа эхлүүлж байна. Бидэнд эдийн засгийг тогтворжуулах, төгрөгийн худалдан авах чадварыг нэмэгдүүлэх, ард иргэдээ ажлын байраар хангаж, орлоготой болгох, хувийн хэвшлийн бизнесийг дэмжих, томоохон төслүүдийг хөдөлгөж, эдийн засгийн эргэлтэд оруулахын зэрэгцээ байгалиа хамгаалах, байгалийн нөөцөө хаягдалгүй ашиглах шаардлага тулгарч байна.
Эдийн засгийн нөхцөл байдал амаргүй байгаа ч, Засгийн газар ирээдүйгээ өөдрөгөөр харж, хямралаас гарах цогц төлөвлөгөө боловсруулж байна. Нийгэмд хүлээлт үүсгээд байгаа хүүхдийн мөнгө болон ипотекийн зээлийг үргэлжлүүлнэ олгоно гэдгийг дуулгахад таатай байна.” гэлээ.
Тус уулзалтын үеэр 12 хүүхдэд “Отгонтэнгэр” их сургуульд дөрвөн жил сурах эрхийн бичгийг гардуулав. УИХ-ын гишүүн Д.Оюунхорол “Эдийн засгийн хямралаас болж сурья гэсэн чин хүсэл эрмэлзэлтэй ч сургалтын төлбөр нь дарамт болж, сургуулиасаа чөлөө авч байгаа олон хүүхэд байгаа. Өнөөдөр та бүгдэд үнэ төлбөргүй сурах боломжийг олгож байна. Энэ боломжийг ашиглан сайн суралцаж, улс орондоо хэрэгтэй, мэдлэг чадвартай боловсон хүчин болоорой” хэмээсэн юм. Мөн тойргийнхоо хороодын ЕБС-ийн 200 орчим хүүхдэд хичээлийн хэрэгсэл гардуулж өгсөн бол насаараа улс орныхоо хөгжилт, цэцэглэлт үнэтэй хувь нэмрээ оруулсан ахмадууддаа салбарын болон намын одон медаль гардууллаа.
