Өглөө.мн Шинэ өглөө, Шинэ мэдээлэл
Манай сонинд бяцхан О.Амина охины талаар сурвалжлага нийтлэгдсэн билээ. Энэхүү нийтлэлийн мөрөөр мянга мянган хүн тусламжийн гараа сунгаж хандив өргөж байна. Түүнчлэн “Өдрийн сонин”-ы хамт олон О.Амина охины эмчилгээнд зориулж нэг өдрийн цалингаа хандивлалаа. Бяцхан охины өсөлт одоогоор зогсоод буй.
Тэрээр дөрвөн настай ч хоёр настай хүүхэд шиг жижигхэн, турьхан биетэй. Учир нь түүнийг хоёр нас дөнгөж хүрээд шувуухай шиг жиргэж байх үед нуруу нь мурийж, өсөлт нь зогсчээ. Эмнэлгийн хэллэгээр бол нейрофеброматозис гэж хэл хугалчихмаар нэр томьёотой юм. Харамсалтай нь энгийн хүн шууд ойлгохгүй энэхүү оношийг Монголд эмчилж чаддаггүй юм байна. Охины нуруу мурийлтаасаа болоод хавдрын урьтал үедээ орчихсон байна гэнэ. Иймд өдөр алдахгүй Солонгос руу явж яаралтай мэс засалд оруулахаас өөр аргагүй болжээ.
Тэндээс “Охины нуруу тавин хэмээс дээш хазайлттай байгаа. Мэдрэлийн судас нь ясандаа дарагдаж, тэр нь хавдсан. Тиймээс яаралтай хагалгаа хийлгэх шаардлагатай” гэсэн хариу ирүүлжээ. Хагалгааг “Korea” их сургуулийн хүүхдийн нуруу нугасны тасгийн эмч нар хамтарч хийх юм билээ. Хагалгаанд нийтдээ 90 орчим сая төгрөг шаардлагатай юм. Тиймээс сайхан сэтгэлт хүмүүс минь та бүхэн энэ бяцхан охинд тусалж, хандивын гараа сунгана уу. Монголчууд бид хүүхдийг өндөр болоорой гэж ерөөдөг ард түмэн билээ.
Хандивын данс:
Голомт банкны
1605030923
Хаан банкны
5007471852
Хасбанкны
5001215647
Төрийн банкны
101400146310
Хүлээн авагчийн нэр: О.Одонсансар.
Холбоо барих утас: 88127920, 89807465
