Дорнод аймгийн Матад сумын “Петрочайна дачин тамсаг” компанийн туслан гүйцэтгэгч “Зөв боломж” компанийн ажилчид хордсон хэрэг дээр Улаанбаатар хотоос хөдөлсөн шуурхай ажлын хэсэг ажиллаж байгаа билээ. Ажилчдын хордсон гэх бодисыг тус компанид гаднын иргэн нийлүүлжээ. Тодруулбал, хүнсний ногоо нийлүүлдэг Хятад эмэгтэй энэ бодисыг нийлүүлсэн байна. Тэрбээр 5 литрийн савтай, 3 ширхэг метилийн спирт оруулж ирсэн нь шалгалтаар тогтоогдож хэргээ хүлээгээд байгаа аж. Хордсон иргэдэд хийсэн шинжилгээгээр техникийн спиртийн хордлого гэсэн онош гарчээ. Үүнд нь этил, метил болон бусад техникийн цэвэрлэгээнд ашигладаг бодисууд орсон байдаг байна. Лабораторийн шинжилгээний дүнд хордсон иргэдийн эмнэлзүйн шинж тэмдэгтэй таарч байгааг ЭМЯ-ны Хордлого судлалын ерөнхий мэргэжилтэн доктор, профессор С.Юндэн хэллээ. Хордсон ажилчид анх ирэхдээ хараа бүдгэрсэн, хавантай байжээ. Харин одоо биеийн байдал нь харьцангуй дээрдэж Сэхээн амьдруулах тасагт хэвтэж байгаа 2 иргэний бие тогтвортой хүндэвтэр, 3 нь дунд гэсэн байдалд шилжжээ. Харин үлдсэн иргэдийн хувьд ерөнхий эмчилгээний тасагт хэвтэн эмчлүүлж байна. Яг одоо цус цэвэршүүлэх, хоргүйжүүлэх эрчимт эмчилгээ хийгдэж байна. Ямартай ч хордлогын голомт намжсаныг албаныхан хэлэв.