74 настай эмээг дээрэмдсэн хэрэгтнүүдийн ялыг хэвээр үлдээв

Улсын Дээд шүүхийн хяналтын шатны эрүүгийн хэргийн шүүх хуралдаанаар Л.Амаржаргал, Э.Мөнх-Эрдэнэ, А.Баатар нарт холбогдох хэргийг өнөөдөр хянан хэлэлцлээ. Шүүгдэгч нарын өмгөөлөгчдийн гаргасан гомдлын дагуу шүүх хуралдааныг дахин хийсэн байна.

Л.Амаржаргал, Э.Мөнх-Эрдэнэ, А.Баатар нар урьдчилан үгсэн тохиролцож, 2016 оны нэгдүгээр сарын 7-ны орой 22 цагийн үед Баянгол дүүргийн 15 дугаар хорооны нутаг байрлах 24 дүгээр байрны орцонд 74 настай иргэн Ц-ийн эд хөрөнгийг авсан. Тэд амь биед нь аюултайгаар хүч хэрэглэн довтолж, иргэн Ц-ийн бие махбодид хүндэвтэр гэмтэл учруулан, цүнхтэй эд зүйлийг дээрэмдэж, 300.000 төгрөгийн хохирол учруулсан.

Баянгол дүүргийн Эрүүгийн хэргийн анхан шатны шүүх Эрүүгийн хуулийн 147 дугаар зүйлийн 147.2 дахь хэсэгт зааснаар Л.Амаржаргалд 6 жил, Э.Мөнх-Эрдэнэ, А.Баатар нарт тус бүр 5 жил 1 cap хорих ял оногдуулсныг давж заалдах шатны шүүх хэвээр үлдээсэн юм.

Улсын Дээд шүүхийн хяналтын шатны эрүүгийн хэргийн шүүх хуралдаанаар уг хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээж, шүүгдэгч нарын өмгөөлөгчдийн гаргасан гомдлыг хэрэгсэхгүй болгож шийдвэрлэжээ.