МАН-ын тэргүүлсэн Засгийн газар 2016-2020 оны үйл ажиллагааны хөтөлбөртөө тусгасан “Ач санах тухай хууль”-ийг баталж, ахмадуудад “Насны хишиг” олгохоор болсон. Энэ хуулиар 65-69 насны ахмадуудад 50 мянга, 70-79 насны ахмадуудад 80 мянга, 80-89 насны ахмадуудад 150 мянга, 90 ба түүнээс дээш насны ахмадуудад 250 мянган төгрөгийн буцалтгүй тусламж олгох бөгөөд улсын хэмжээнд 65-69 насны 42096 ахмад, 70-79 насны 52403, 80-89 насны 17559, 90 ба түүнээс дээш насны 2366 ахмад буюу нийт 114424 ахмад настан байгаа юм. “Насны хишиг”-ийг ахмадуудад жилд хоёр удаа буюу Цагаан сар болон Наадмын өмнө олгохоор болсон. Тэгвэл “Насны хишиг”-ийг энэ жилийн сар шинийн баярын өмнөхөн шахуу олгож эхэлсэнтэй холбогдуулан “Насны хишиг”-ээ авч амжихгүй ахмадууд санаа зовох хэрэггүй бөгөөд энэ оны зургадугаар сарын 30-наас өмнө нөхөн авч болно гэдгийг албаныхан хэллээ.