Сунгаагаар “занималдсан” Ардчилсан нам

Сунгаагаар “занималдах” болсон АН-ын дотоод сонгууль хэл ам, хэрүүл тэмцэл ихтэй болж өндөрлөлөө. Өнөдөрлөлөө ч гэж дээ, одоо л тэдний тэмцэл эхэлж байна. Намын даргаа сонгохоосоо эхлүүлээд ҮБХ-ны гишүүд, нийслэл, аймаг, дүүрэг, сумын намын дарга нараа сунгаагаар тодруулсан АН-ын шинэ удирдлага өчигдөр хэвлэлийн хурал хийв. Тэрхүү хурлын үеэр С.Эрдэнэ дарга “С.Баярцогтын тухай гишүүдээс санал, гомдол ирсэн учир өрсөлдөх эрхийг нь түдгэлзүүлсэн” хэмээн мэдэгдлээ. Уг нь С.Баярцогт АН-д хэрэгтэй “кадр”. Даанч “оффшортон” гэсэн хар шошго нь түүнийг муухай харагдуулж байна.
Үндсэндээ З.Энхболдын УИХ-ын ялагдлын шалтгаанаа С.Баярцогтод нялзаадаг шиг л юм уу даа, янз нь. Нөгөө талаасаа С.Баярцогттой өрсөлдсөн “Шонхор” фракцийн нөхөр ялагдчих гээд байсан учраас түүнийг албан хүчээр татсан хэрэг. С.Эрдэнэ тэргүүтэй АН-ын шинэ удирдлага энэ мэтээр лидерүүдээ лойдрын түвшинд унагаад байвал удаан тэсэхгүй л болов уу. Мөн тэрбээр хэвлэлийн бага хурлын үеэр “Ардчилсан намын удирдлагад оффшор данстай хүн байх нь зохисгүй” гэж хэлсэн нь далдуур С.Баярцогтыг “баяртай” гээд хэлчих шиг боллоо. Арга ч үгүй биз. Улс орон даяараа оффшорын эсрэг тэмцэж байхад намдаа байгаа оффшорчин нөхрийн толгойг илээд намынхаа удирдлагад оруулчихвал С.Эрдэнийн толгойны өвчин нэгээр нэмэгдэнэ. Нөгөөтэйгүүр эсрэг нам болох МАН-ын дарга М.Энхболд нь оффшортнуудад нударганы амт үзүүлэхээр нэгэнт шийдчихсэн байхад С.Эрдэнэд гарах гарц байхгүй. Гэхдээ л С.Баярцогт дуугүй хасагдаад өнгөрөх хүн лав биш. Тэр С.Эрдэнийн эсрэг, түүнийг унагахаар ямар нэгэн хор найруулж л суугаа. Түүнд нь хэн дэмжлэг үзүүлэх вэ гэхээр Н.Алтанхуяг тэргүүтэй, Ч.Сайханбилэг удаатай “Алтан гадас”-чууд…
Ялангуяа намын даргын суудлаа Ерөнхий сайдын албан тушаалтайгаа алдсан Н.Алтанхуяг сэтгэл дотроо их уур хилэн тээж яваа. Энэ уур хилэнгээ хэд, хэдэн удаагийн хэвлэлийн хурлаар гаргаад амжсан. Тиймдээ ч намын даргад өрсөлдөж, “Шонхор” фракцийнханд далаараа цэвэр тавиулсан ч гандан буурахгүй Ерөнхийлөгчийн сонгуульд хүч үзэх санаархал тээж яваа нь З.Энхболд, С.Эрдэнэ хоёрын толгойны өвчин болчихоод байна. Эсрэгээрээ “Шонхор” фракцийн дураараа дургиж, дунд чөмгөөрөө жиргэж байгаа нь Ч.Сайханбилэг, С.Баярцогт хоёрын дургүйг ихээр хүргэж байгаа нь лавтай. Энэ бүх нам доторх богино зайн улс төр нь эргээд Н.Алтанхуяг, Ч.Сайханбилэг, С.Баярцогт гэсэн пирамидыг босгох хүчин зүйл болж мэднэ. Хэрэв энэ гурав эргээд нэгдвэл З.Энхболд, С.Эрдэнэ хоёр буланд шахагдаж буцах хаяггүй, буух газаргүй болж мэдэх талтай. Дээрээс нь дотоод сонгуулийн гадна үлдсэн хэсэг нэр нөлөө бүхий гишүүд нь ороод ирвэл бүр ч хэцүүднэ, “Шонхор”-ынхонд…
УИХ-ын сонгуулиас хойш сунгаадсан АН-ынханд С.Эрдэнэ даргын хэлснээр дахиад нэг сунгаа бий. Тэр нь Ерөнхийлөгчийн сонгуульд нэр дэвшигчээ тодруулах. Дэнчин мөнгө нь хэд байх нь одоохондоо тодорхой болоогүй байна. Бодвол Монгол Улсын номер нэгийн төлөө өрсөлдөхийн тулд 500 саяас нэг тэрбум төгрөгийн асуудал хөндөгдөх болов уу хэмээн гишүүд нь шивнэлдэж сууна. Мөн Ерөнхийлөгчийн сонгуульд нэр дэвшигчээ өрсөлдүүлэхийн тулд таван намын дунд, фракциудын хооронд багагүй “зодоон” болно. Энэ зодоонд ялсан фракци нь “Шонхор”-ынхноос сонгуулийн дараа намын удирдлагыг булаах нигууртай. З.Энхболд, С.Эрдэнэ хоёр сунгаанаас сунгааны хооронд дэвж байх зуур нөгөө хэдэн фракци нь нэгдэн нийлж өөрсдийг нь унагаах “барборис” төлөвлөгөө боловсруулж байгааг мэдээгүй л байх даа. Ардчилсан намаа гэж… Тэмцэл, талцал нь хэзээ ч дуусахгүй юм даа.

Эх сурвалж: