Монгол, Хятадын Гаалийн ерөнхий газрууд хар тамхины чиглэлээр хамтарч ажиллахаар боллоо

Монгол Улсын ГЕГ-ын дарга Б. Асралт БНХАУ-ын ГЕГ-ын дарга Юй Гуанжоутай хоёр талт ажлын уулзалт хийлээ.

Тус уулзалтаар Монгол Улс, БНХАУ-ын гаалийн байгууллага хоорондын хамтын ажиллагаа, хилийн боомтын үйл ажиллагаа, дэд бүтэц, менежментэд тулгамдаж буй асуудал, тэдгээрийг шийдвэрлэх арга зам, цаашид хамтран ажиллах чиглэлийг харилцан тохиролцлоо. Үүнд:

• Хар тамхи, мансууруулах бодисын тээвэрлэлтэд хяналт тавих, гэмт хэргийг илрүүлэх, таслан зогсоох чиглэлээр нягт хамтын ажиллагаатай ажиллахын зэрэгцээ улсын хилээр хууль бусаар нэвтрүүлэхтэй тэмцэх чиглэлд онцгой анхаарал хандуулахаар болов.
• “Манифестийг цахимжуулах төсөл”-ийн хүрээнд манифестийг цахим хэлбэрээр солилцох туршилтын ажлыг эхлүүлэхээр тохиролцов. 

 Монгол, Хятадын хилийн боомтуудын хөгжил, тулгамдаж буй асуудлыг шийдвэрлэх арга замын талаар харилцан санал солилцон, нэгдсэн ойлголтод хүрч, протоколд гарын үсэг зурлаа.

Эх сурвалж: Гаалийн Ерөнхий Газар