Өглөө.мн Шинэ өглөө, Шинэ мэдээлэл
Монголын хошин урлагийн шилдэг продакшны нэг болох “Мөрөөдлийн театр”-ын уран бүтээлчид намар цагийн нээлтийн тоглолт “Social эвлүүлэг” нэртэй энтертайнмэнт шоу тоглолтыг энэ сарын 30-нд үзэгч түмэндээ толилуулж эхэллээ.
Дуу бүжиг, энтертаймэнт, элдэв сюрпризээр дүүрэн “Social эвлүүлэг” инээдмийн шоу тоглолтыг үзэгчид халуун алга ташилтаар угтаж, сэтгэл хангалуунаар хүлээн авлаа.
Үргэлж шинийг сэдэж бусдыгаа түүчээлж байдаг Мөрөөдлийн театрын “Social эвлүүлэг” тоглолтод МУСТА Д.Баттөмөр, МУСТА Г.Эрхэмбаяр, МУСТА Д. Сөрөлт, МУСТА Г.Алтаншагай, МУСТА Б.Баттулга, Ц.Ганбаяр, МУСТА Б.Отгонтуяа нараар ахлуулан бүрэн бүрэлдэхүүнээрээ оролцон тоглож байна.
Мөрөөдлийн театрын “Social эвлүүлэг” тоглолтод урилгаар булдруу нэрээрээ алдаршсан А.Өсөх-ирээдүй ,“ Цэцэг” хамтлагийн дуучин СТА Ч.Батболд, дуучин СТА А.Түмэн-Өлзий нар урилгаар оролцож өөрсдийн уран бүтээлийн дээжээс өргөн барилаа.
Шоу тоглолтын дараа тус хамтлагийн захирал, жүжигчин МУСТА Д.Баттөмөр : Тоглолт маань танхим дүүрэн үзэгчидтэй сайхан үргэлжилж байна. Манай энэ удаагийн тоглолтод урилгаар нэгэн үе үзэгч сонсогчдыг байлдан дагуулж байсан “Цэцэг ” хамтлагийн дуучин Ч.Батболд ах, дуучин СТА А. Түмэн-Өлзий, сошиал ертөнцөд булдруу нэрээрээ алдаршсан А. Өсөх-ирээдүй нар оролцож байгаа юм. Бид А. Өсөх-ирээдүйг Увс аймгаас онгоцоор авчирлаа. Түүний эгч нь энэ жил КУДС-ийн оюутан болсон юм билээ. Тэгэхээр энд байх нэг сарын хугацаанд эгчтэйгээ хамт байна. Булдруу маань энэ жил хоёрдугаар ангийн сурагч болсон юм байна лээ. Тиймээс бид хичээлээс нь хоцроохгүйн тулд энд түр хугацаанд сургуульд оруулсан хэмээн сэтгэгдлээ хуваалцлаа.
“Мөрөөдлийн театр”-ын шинэ тоглолтын нээлт үзэгч олны халуун алга ташилт дунд өндөрлөсөн юм. Нээлтийн тоглолтын дараа үзэгчдийн сэтгэгдлийг сонслоо.
У. Цэрэнжав: Сайхан тоглолт болж байна. Инээлээ, дагаж дууллаа. Манай байгууллага ахмад настнуудаа хүлээн аваад тоглолт үзүүлж байгаа юм. Сэтгэл өндөр сайхан байна. Тоглолт хийсэн хүүхдүүдийнхээ уран бүтээлд өндрөөс өндөр амжилт хүсье, эмээ нь
Ч.Сэргэлэн: Эвлүүлгүүд үнэхээр таалагдлаа. Дагаж дуулсаар л гарч ирлээ. Өнөөдрийн тоглолт их сайхан боллоо. Баярлалаа, “Мөрөөдлийн театр”-ын уран бүтээлчиддээ.
Л.Болорчулуун: “Мөрөөдлийн театр”-ын анхны тоглолтыг ч бас үзэж байлаа. Өнөөдөр бас сэтгэл хангалуун байна. Энэ тоглолтыг үзэх гэж байгаа бол зорин ирээрэй гэж хэлмээр байна.
Тус тоглолт өдөр бүр Соёлын төв өргөөнд 19 цагаас тоглогдох бөгөөд тасалбарын үнэ 13000 төгрөгийн үнэтэйгээр СТӨ-ний билетийн кассаар борлуулагдаж байна.
Ингээд хошин урлагийг шимтэн үзэгч та бүхэндээ“Social эвлүүлэг” инээдмийн энтертайнмэнт шоу тоглолтын сонирхолтой рекламыг хүргэж байна.
Г.Нараа
