Шингэн үсийг сэрүүний улиралд хэрхэн арчлах вэ?

Ялангуяа хүйтэн сэрүүний улиралд шингэн үсны хэлбэрийг хадгалах үнэхээр төвөгтэй байдаг. Өтгөн үстэй хүмүүс хүссэн малгайгаа өмсөж, дурын засалтаар үсээ засуулж болдог бол шингэн үс нь хүрэх төдийд л хэлбэрээ алдан шалчийж, бариу малгайнаас татгалзахад хүргэдэг шүү дээ. Иймд бид та бүхэндээ шингэн үсийг хэрхэн арчлах болон, тохирох үс засалтыг танилцуулъя.

1. Үсний хэлбэрийг хэрхэн хадгалах тухай 

Та шингэн хэрнээ хэлбэрээ удаан барьдаггүй зөөлөн үстэй бол хичнээн халуун сэнс, хайч, индүү хэрэглэсэн үр дүн муутай байх болно. Эсрэгээрээ таны үсийг гэмтээж, ширүүн болгохоос хэтрэхгүй. Шингэн үстэй хүмүүст богино үсний засалт илүү тохирно. Ингэснээр хэлбэрээ хадгалахад ч мөн тустай. Ингэхдээ үс хэлбэржүүлэгч хөөс хэрэглэх нь зөв.

2. Үс яагаад унаж, шингэрдэг тухай

Хүний биеийн организмийн хэвийн үйл ажиллагаа алдагдах, стресс, уур бухимдал, эмийн зохисгүй хэрэглээ, химийн өндөр найрлага бүхий бүтээгдэхүүн хэрэглэх,  төрсний дараа болон өмнөх үеүүдэд ихэвчлэн үс унах нь түгээмэл тохиолддог. Мөн удамшлын гаралтай ч байж болно. Иймд та үсээ 3 сар тутамд үзүүрээс нь тайралт хийлгэх, хэт хүчтэй бүтээгдэхүүн хэрэглэхгүй байх, халуун сэнс, хайч, индүү зэргээс аль болох зайлсхийх нь чухал. Хамгийн гол нь өдөр тутамдаа үсээ зөв угаах, арчлах арга барилыг суралцаарай!

Мөн амин дэмийн дутагдлаас үүдэж, үс ихээр унах шалтгаан болдог тул, та витамин А,В,С,Е-г нэмэлтээр хэрэглэж болно. Түүнчлэн аль болох ургамлын гаралтай шампуниар үсээ угааж, давтамжаа багасгаарай.

3. Шингэн үсэнд ямар үсний засалт тохиромжтой вэ?

Шингэн үстэй хүмүүс хэт богино, эсвэл урт засалтаар үсээ аль болох засуулахаас зайлсхийх нь зөв. Мөн үсээ угаасны дараа чийгтэй үед нь үс хэлбэржүүлэгч хөөс ашиглаарай. Үсний засалтаас шалтгаалж таны үс шингэн эсвэл өтгөн харагдаж болно. Ихэвчлэн

пикси
каскад
итали хэв маягийн засалт
вандуй хэлбэрийн үсний засалт тохиромжтой байдаг.

4. Үс өтгөрүүлж, ургуулах маск хэрхэн бэлтгэх вэ?

Гадил жимс нь таны үсний ургалтыг дэмжих гайхалтай бүтээгдэхүүн билээ. Энэ нь зэс, кали, төмөр, А, В, С болон Е витаминаар баялаг төдийгүй хуурайшсан хуйхыг чийгшүүлнэ.Харин та энэхүү жимсийг ашиглаж, үсний маск бэлтгэж болох юм.

Орц:

-Гадил – 1 ширхэг
-Өндөг – 2 ширхэг
-Кокосын сүү
-Зөгийн бал
-Оливын тос

Бүх орцоо нэгтгэж, блендэрт хийж эргүүлээрэй. Үүнийгээ үсэндээ түрхэж, 30 минут байлгах бөгөөд үснийхээ гадуур шүршүүрийн малгай өмсөх хэрэгтэй. Дараа нь та үсээ урьдын адил шампунь ашиглаж угаагаарай.

Үүнийг хэрэглээд, эрүүл намирсан үстэй болоорой!

Олон зуун жилийн өмнөөс халуун оронд амьдардаг хүмүүс кокосын тосыг гоо сайхан, эрүүл мэнддээ ашигласаар иржээ. Харин энэхүү тос нь сүүлийн жилүүдэд улс орон бүр худалдаалагдах болсон тул, хүссэн хүн бүхэн нь хэрэглэж, гайхалтай ашиг шимийг нь хүртэх боломжтой болсон билээ. Тэгвэл бид кокосын тосны тусламжтайгаар үсээ намирсан эрүүл болгох тухай мэдээллийг танд хүргэх гэж байна.

1. Кокосын тосны ашиг тус:

Та энэхүү тосыг гоо сайхан, гэр ахуйн хэрэглээ болон хоол хүнсэндээ ашиглаж болно. Харин танд эдгээрээс онцгойлон гоо сайханд ашиглаж болох санаануудыг дуулгая.

Чийгшүүлнэ: Кокосын тос нь хуурайшсан үсэнд чийгшил өгч, эрүүлжүүлнэ.
Тэжээл өгнө: Байгалийн гаралтай тос нь тэжээллэг чанартай бөгөөд их хэмжээний омега 3 болон төрөл бүрийн витамин агуулдаг. Энэ нь таны үсний ургалтанд нөлөөлж, эрүүл, намирсан урт болгох аж.
Антисептик болон бактерийн эсрэг шинж чанартай: Гэмтэлтэй үсийг эмчилж, хаг, үрэвслийг арилгаж, хуйханд тэжээл өгөх болно.
Үсийг хамгаална: Та кокосын тосыг хэрэглэж, хүчтэй салхи, нарны хэт ягаан туяа зэргээс үсээ хамгаалж чадна.

2. Кокосын тосыг хэрхэн сонгох вэ?

Кокосын тос нь хоёр өөр төрөлтэй байдаг. Цэвэршүүлсэн болон 100 хувь байгалийн гаралтай хэмээн хоёр төрөлд хуваагддаг байна. Гоо сайхан арчилгаанд цэвэршүүлсэн тос нь илүүтэй тохиромжтой. Мэдээж 100 хувь байгалийн гаралтай, ямар нэгэн нэмэлт бодисгүй тос нь танд таатай сонсогдож байж болох ч, гоо сайханд ашиглахад тохиромжгүй юм. Учир нь цэвэршүүлээгүй тос нь арьсанд тохирохгүй харшил үүсгэх аюултай байдаг аж.

Кокосын тос нь 25 хэмд хайлдаг бөгөөд үүнийг хөргөгчинд хадгалж, илүү удаан хэрэглэх боломжтой. Мөн тус тосноос багаханыг авч гарын алгандаа үрэх төдийд хайлж, шингэн байдалд шилждэг байна.

Мөн цэвэршүүлсэн кокосын тос нь цагаан өнгөтэй байдаг бол, 100 хувь байгалийн гаралтай нь шаргал, бор өнгөтэй байх аж. Та кокосын тосыг гоо сайхны дэлгүүрүүд, томоохон супермаркет зэргээс худалдан авах боломжтой бөгөөд хэрэв олдохгүй бол онлайнаар захиалж аваарай.

3. Гэртээ кокосын тосыг хэрхэн бэлтгэх вэ?

Танд энгийн кокос буюу наргил модны самар хэрэг болно. Кокосныхоо сүүг тусдаа саванд хийж, суллаарай. Харин үлдсэн кокосны хальсаа мах бутлагчинд хийж, нунтаглана. Дараа нь буцалсан усанд нунтаг самараа хийж, хөргөгчинд хонуулах хэрэгтэй. Маргааш өглөө нь таны бэлтгэсэн савтай усны дээгүүр шар өнгийн тос тогтсон байх бөгөөд та үүнийг тусдаа саванд хийж авснаар, өөрийн гэсэн тостой болох юм. Тус тосыг 14 хоногийн турш хадгалан хэрэглэж, үсээ арчлах боломжтой.

4. Хэрхэн үсэндээ түрхэх вэ?

Кокосын тосыг үсэндээ түрхэж хэрэглэх 3 арга бий.

Маск бэлтгэх
Шампуньтай хольж хэрэглэх
Шууд дангаар нь хэрэглэх

Эхлээд тосоо ямар ч хольцгүйгээр дангаар нь хэрэглээрэй. Ингэхдээ 3-4 халбага кокосын тосыг үсэндээ тараан түрхэж, гадуур нь алчуураар боож, 1-2 цаг байх хэрэгтэй. Дараа нь шампунь ашиглаж үсээ угааж, хатаагаарай.

5.Кокосын тосны бусад хэрэглээ:

Та шампуниа багахан кокосын тостой хольж үсээ угаагаарай. Ингэснээр үс илүү зөөлхөн намирсан болох бөгөөд самнахад ямар ч төвөггүй болсох байх болно.
Багахан кокосын тосыг гартаа түрхэж, зөөлхөн тойруулж илээрэй. Дараа нь тэрхүү тосноосоо авч үсэндээ маш нимгэн түрхэх хэрэгтэй. Энэ нь таны үсийг арзайхаас сэргийлэх төдийгүй гялалзсан харагдуулна.
Үс тань хэт хуурай бол үсний самандаа кокосын тосноос түрхэж, дараа нь үсээ самнаарай.
Зуны улиралд кокосын тос нь таны үсний хамгаалагч болно. Кокосын тосыг үсэндээ түрхэснээр халуун наранд түлэгдэж, гандахаас сэргийлэх төдийгүй голын усанд орсноор үс өнгө зүсээ алдана хэмээн айх аюулгүй болох юм.
Хэрвээ үс тань ширэлдсэн бол тухайн хэсэгтээ кокосын тос түрхэхэд хангалттай.

6.Зөвлөмж:

Хэрэв таны үс хэт хуурай биш бол, кокосын тосыг өдөр тутамдаа хэрэглэх шаардлагагүй. Мөн хэрэглэж байгаа тохиолдолд хуйх угт биш үсэндээ түрхээрэй.

Кокосын тос үсэндээ түрхсэн тохиолдолд 1-2 цагийн дараа угааж байгаарай. Хүмүүс үсэндээ тос түрхэж, хонуулаад өглөө нь угаах тохиолдол олон гардаг. Гэвч энэ нь буруу бөгөөд үсний тослогийг алдагдуулж, угаагаад ч тос нь арилахгүй байх нөхцлийг бүрдүүлдэг аж.

Та кокосын тосыг үснээсээ хэрхэн арилгах вэ? гэж толгойгоо гашилгах шаардлагагүй. Ердөө л шампунь ашиглаж угаахад арилах бөгөөд нэг угаалтаар арилахгүй бол ахин нэг сайтар угаагаад үзээрэй.

Энэхүү тос нь таны арьс болон үсийг огт гэмтээхгүй. Хамгийн муугаар бодоход та өдөржингөө тослог үстэй гадуур явах хэрэг гарах аж. Хэрэв үснийхээ тосыг сайтар арилгаж чадвал, кокосын тосны үзүүлэх сөрөг нөлөө гэж ганц ч үгүй юм.

Эх сурвалж: Саак.мн