Х.Амгаланбаатар: Эрүүл мэндийн даатгалын сангийн хөрөнгө бол Засгийн газрынх биш

МҮЭ-ийн холбооноос Эрүүл мэндийн даатгалын тогтолцооны бие даасан байдлыг хангах талаар өнөөдөр мэдээлэл хийлээ.

Тухайлбал МҮЭ-ийн холбооны ерөнхийлөгч Х.Амгаланбаатар тэргүүтэй гишүүд Эрүүл мэндийн даатгалын санг Эрүүл мэндийн Яамны мэдэлд шилжүүлэх асуудлыг эсэргүүцэж буй гэдгээ илэрхийлэв. Тэдний зүгээс эрүүл мэндийн яамны мэдэлд шилжвэл эрүүл мэндийн даатгалын холбогдох хууль тогтоомжийг зөрчиж байна гэсэн байр сууриа илэрхийллээ.

МҮЭХ-ны ерөнхийлөгч Х.Амгаланбаатар: Эрүүл мэндийн даатгалын сангийн удирдах дээд байгууллага нь Эрүүл мэндийн даатгалын үндэсний зөвлөл гэж байгууллага бий. Өнөөдрийн байдлаар Эрүүл мэндийн даатгалын үндэсний зөвлөл нь нэг ч удаа хуралдаагүй.

Ийм байхад Эрүүл мэндийн даатгалын санг ЭМЯ-д шилжүүлэх асуудлыг Засгийн газар, УИХ-аар ярьж байгаа нь холбогдох хууль тогтоомжийг зөрчиж байгааг бид эсэргүүцнэ. Нэгдүгээрт Эрүүл мэндийн даатгалын үндэсний зөвлөлөө хуралдуулж энэ асуудлыг ярих ёстой.

Эрүүл мэндийн даатгалын сангийн хөрөнгө бол Засгийн газрын хөрөнгө биш. Эрүүл мэндийн даатгалын санд өөрийнхөө цалин орлогоос шимтгэл өгсөн даатгуулагчдын хөрөнгө. Ийм учраас хөрөнгөө даатгуулагчид мэдэх ёстой. Даатгуулагчдын төлөөлөл Эрүүл мэндийн даатгалын сангийн Үндэсний зөвлөлд орж шийдвэр гаргах явцад нь оролцох ёстой” гэлээ.