Өглөө.мн Шинэ өглөө, Шинэ мэдээлэл
Авлигатай тэмцэх газрын дэргэдэх Олон Нийтийн Зөвлөлөөс “АТГ нь авлигатай тэмцэхгүй байгааг 2017 оны авлигын индекс батлав уу?” сэдвээр өнөөдөр хэвлэлийн хурал хийлээ.
Эрдэнэт үйлдвэрийг Стандарт банканд барьцаалсан асуудалтай холбогдуулан Авлигатай тэмцэх газрын дэргэдэх Олон Нийтийн Зөвлөлийн гишүүн Б.Анхныбаяр “Эрдэнэт үйлдвэрийг аливаа нэгэн бизнес эрхлэгч болон тус газрын удирдлагууд ямар нэгэн зээлийн барьцаанд гаргах хуулийн эрх мэдэл байхгүй. Эрх мэдлээ урвуулан ашиглаж Эрдэнэт үйлдвэрийг барьцаанд тавьсан этгээдүүдийг АТГ мөрдөн шалгаж, хариуцлага хүлээлгэх үүрэгтэй. Энэ хэрэгт тухайн үед Ерөнхий сайд байсан С.Баяр, Төрийн өмчийн хорооны дарга байсан Д.Сугар, Эрдэнэт үйлдвэрийн дарга асан Ч.Ганзориг, УБТЗ-ын дарга асан Т.Очирхүү, “Жаст” группийн Ш.Батхүү нар нь санаатайгаар эх орноосоо урвасантай дүйцэхүйц хэмжээний гэмт хэргийг үйлдсэн.
АТГ Эрдэнэт үйлдвэрийг барьцаалсан дээрх нэр бүхий этгээдүүдийг өнөөдрийг хүртэл шалгахгүй байна. Шалгасан ч хуулийн боломжит хугацаа маш удаанаар, хаацайлсаар ирсэн. Иймд АТГ-ын дарга үүргээ биелүүлээгүй учраас огцрох ёстой гэж бид үзэж байна.
Мөн Д.Сугарыг Үндсэн хуулийн цэцийн гишүүнээс, С.Баярыг Их британи, Умард Ирландын Нэгдсэн Вант улсад суугаа Элчин сайдаас нь тус тус эгүүлэн татаж шалгах хэрэгтэй. Эдгээр хүмүүс нь авлигын шинжтэй гэмт хэрэг үйлдсэн нь тодорхой болчихоод байгаа” гэлээ.
