Өглөө.мн Шинэ өглөө, Шинэ мэдээлэл
Нийслэлийн хэмжээнд энэ дөрөвдүгээр сарын 2-ны байдлаар, амбулаторийн 70,646 үзлэг хийгдсэнээс томуу, томуу төст өвчтэй 2,710 тохиолдол оношлогджээ. Энэ нь нийт үзлэгийн 3.8 хувийг эзэлж байгаа бөгөөд өнгөрсөн долоо хоногийн дундаж төвшнөөс 0.1 хувиар бага, өнгөрсөн оны мөн үеэс 0.4 хувиар их байна.
Нийт өвчлөгсдийн 36.7 хувийг 0-1 нас, 32.5 хувийг 2-4 нас, 16.5 хувийг 5-9 насны хүүхдүүд эзэлж байгаа юм. Хүүхдийн түргэн тусламжийн 1,149 дуудлага ирснээс 41.3 хувь нь томуу, томуу төст өвчний тусламж, үйлчилгээг авчээ.
Нийслэлийн эмнэлгүүдийн хувьд, нийт орны ачаалал өнгөрсөн долоо хоногийн дундаж төвшнөөс 10 хувиар бага байна.
Томуу, томуу төст өвчин буюу амьсгалын замын цочмог халдварын үед Нийслэлийн эрүүл мэндийн газраас дүүргийн эмнэлгүүдэд орны зохицуулалт хийж, эмч сувилагч нарын орон тоо болон ажлын цагийн хуваарь, иргэдэд үзүүлэх эмнэлгийн тусламж, үйлчилгээний чанар, хүртээмжид анхаарал тавин ажиллаж байна.
