Өглөө.мн Шинэ өглөө, Шинэ мэдээлэл
Mонгол Улсын Хөдөлмөрийн баатар, Гавьяат тамирчин, Үндэсний бөхийн дархан аварга, Олимпийн мөнгөн медальт Жигжидийн Мөнхбатыг өнөөдөр Алтан-Өлгийд нутаглууллаа.
Өнөөдөр өглөө Спортын төв ордонд түүнтэй салах ёс гүйцэтгэх үеэр Сүмогийн Их аварга Мөнхбатын Даваажаргал “Аавтай минь салах ёс хийхээр “Хоёр Мөнх”-ийн нэг Их аварга Х.Баянмөнх хүрэлцэн ирсэнд сэтгэл маш их хөдөлж байна.
“Хоёр Мөнх” 20 дугаар зууны Монголын үндэсний бөхөд шинэ уур амьсгал оруулж, их спортод ч хамтдаа амжилт үзүүлж эх орон ард түмнээ баясган цэнгүүлсэн билээ.
Төрийн наадамдаа бие биенээ давж ялахын төлөө үнэн шударгаар барилдаж, дэлхийн дэвжээнд дэлхийн суутнуудыг хэрхэн ялах ухааныг хамтдаа сийлсэн хоёр мөнхийн маань үе ийнхүү түүх болон үлдэж байна” гэжээ.
Дархан аварга Жигжидийн Мөнхбатын ар гэр, төрөл төрөгсөд, найз нөхдөд нь гүн эмгэнэл илэрхийлье.
