Өглөө.мн Шинэ өглөө, Шинэ мэдээлэл
Өнөөдрийн бидний мэдэх драмын жүжгийн уламжлалт тавилт, өнгө төрхийг эвдсэн технологийн дэвшлүүд болон бусад хорь гаруй шинэ содон, сонирхолтой шийдлүүдийг багтаасан “Фауст” пост драмын жүжиг тавигдах гэж байна.
Тухайн орны театрын хөгжлийн зэрэг зиндааг илтгэдэг чансаа шалгасан жүжгүүдийн нэгэнд Германы суут зохиолч Гётегийн “Фауст” жүжиг яах аргагүй тооцогддог.
Оросын театр урлагийн сургуулийг найруулагчийн мэргэжлээр дүүргэж ирээд буй залуу найруулагч Мягмарнарангийн Батболддын зориглон барьж авсан алдарт “Фауст” жүжиг 5 дугаар сарын 2-ны өдрөөс эхлэн Соёлын төв өргөөнд тоглогдох гэж байна.
Тус жүжгээс өнөөгийн нийгэм дэх төрөл бүрийн үзэгдэл, хайр дурлал, амьдралын утга учир, хүн өөрийгөө олох, ойлгох тухай хором ч уйдахгүйгээр шинэ сонин шийдлүүдээр харж болох гэнэ.
Үүний нэг нь холограм технологийг Монголд анх удаа театрын тайзнаа ашиглаж байгаа явдал юм. Өөрөөр хэлбэл оргүй хоосон тайзан дээр гэрлийн ойлтын нөлөөгөөр бодит мэт дүрслэл харагдана гэсэн үг.
Зөвхөн холограмаар зогсохгүй өмнө нь ямар ч жүжиг, тайзны урлагт олж харж байгаагүй гайхшруулам олон шийдлүүдийг та “Фауст” жүжгийн явцад харах болно. Тус жүжиг тайзнаа тавигдсанаар Монголын драмын урлаг шинэ төвшинд гарна хэмээн төслийн багийнхан хэлж байгаа юм.
Жүжгийн гол дүрд СТА С.Болд-Эрдэнэ, МУГЖ Л.Баттулга, голлох дүрүүдэд Монгол улсын ардын жүжигчин Г.Мягмарнаран, МУГЖ Б.Жаргалсайхан, МУГЖ Г.Урнаа, СТА Н.Оюунчимэг нар тоглох юм.
Гётегийн Фауст жүжгийг зохиолч, орчуулагч Н.Пүрэвдагва орчуулсан бөгөөд Жүжгийн Ерөнхий продюсераар МУГЖ Г.Мягмарнаран зөвлөх найруулагчаар УГЗ, СУИС-н хүндэт Професор Ч.Найдандорж, Ерөнхий зураачаар МУГЖ Г.Ганбаатар, хөгжмийн зохиолч, найруулагчаар СТА М.Болд ажиллаж байгаа юм байна.
“Фауст” драмын жүжгийг Германы элчин сайдын яамнаас дэмжин ажиллаж байгаа бөгөөд жүжгийг нээж Герман улсын элчин сайд үг хэлэх юм байна.
Мэдээлэл авах дугаар : 8800-8283
