Чи өөрийгөө хайрладаг уу?

Чи хэзээ хамгийн сүүлд өөрөөсөө ингэж асуусан бэ?
1. Би өөрийгөө хайрлаж байна уу?
2. Би өөртөө таалагдаж байна уу?
3. Би өөрийнхөө юу юунд дуртай вэ?
4. Би өөрийнхөө юу юунд дургүй вэ?

Ихэнх хүмүүс “Бусад намайг хайрлаж байна уу? Би бусдад таалагдаж байна уу?” гэдгийг анхаарч үздэг боловч өөрөө өөртөө ямар байна вэ гэдгийг тэр болгон анхаардаггүй. Өөрөөр хэлбэл их олон хүмүүс бусдад таалагдахын төлөө хичээж амьдардаг. Ингэснээр буруудах зүйл байхгүй л дээ. Гэхдээ л үр дүн нь юу вэ гэвэл хамаг амьдралаа бусдын тухай бодож өнгөрөөнө гэсэн үг.

Бодоод үздээ, чи өдөрт хэдэн удаа бусдын тухай боддог вэ?
-Түүнд хэрэггүй тэгж хэлдэг байж
-Тэр миний тухай юу гэж бодож байгаа бол
-Тэгээд хэлчихвэл яах бол
-Миний хэлсэнд тэр уурлаагүй байгаа
-Тэр яагаад дуугай болчихвоо гээд л …

Харин хэдэн удаа өөрийнхөө тухай боддог вэ?
-Би өөртөө яагаад ийм юм хэлэх болов оо?
-Би өөрийнхөө тухай юу гэж бодож байна вэ?
-Би өөртөө юу юу хэлэхээр өөрийгөө гомдоож байна вэ?
-Би өөртөө юу юу хэлэхээр өөрийгөө сэргээж байна вэ?
-Би яагаад уурлаад байна вэ?
-Би яагаад дуугаа хураачихваа гээд л…

Яг ингээд бодоод үзэхээр ийм асуултуудыг өөрөөсөө бараг асуудаггүй байгаа биз?

Тэгэхээр би яг одоо чамаас асуумаар байна:
Чи өөрийгөө хайрладаг уу?
Чи өөртөө дуртай юу?
Чи өөрийнхөө байгаа байдалд дуртай юу?
Хэрвээ чи өөрөө өөртэйгээ гудамжинд тааралдвал хараад юу гэж бодох вэ?
Өөрийгөө хараад энэ яасан аятайхан хүн бэ гээд найз нь болохыг хүсэх үү?
Эсвэл бушуухан хажуугаар нь өнгөрөхийг хичээх үү?
Эсвэл огт тоохгүй юу? Аль нь вэ?

Хэрвээ чи өөрийгөө хараад өөртөө таалагдаж байгаа бол яг юу юунд нь дуртай байна вэ? Хэрвээ таалагдахгүй байгаа бол юу юунд нь дургүй байна вэ? Хэрвээ огт тоохгүй өнгөрөхөөр бол Яагаад? гэдгийг үнэнчээр хариулаарай. Ингэж үнэнчээр хариулснаар өөрийнхөө давуу болон сул талуудыг байгаагаар нь харж хүлээн зөвшөөрч чадах болно.

Өөрийгөө хайрлана гэдэг нь өөрийгөө байгаагаар нь хүлээн зөвшөөрч чадахыг хэлнэ.

Чи өөрийгөө байгаагаар нь хүлээн зөвшөөрснөөр сэтгэл санаа чинь амарна. Чи бусдад таалагдах гэж хичээхээ болино. Хамгийн гол нь өөртөө үнэнч байх хэрэгтэй. Мэдээж чи төгс биш. Чиний энэ төгс биш байдал хүн бүрт таалагдахгүй нь ойлгомжтой. Гэлээ гээд бусдад таалагдахын төлөө биш, анхаарлаа бусадруу биш, анхаарлаа өөрлүүгээ хандуулаарай. Анхаарлаа өөрлүгээ хандуулснаар чи өөртэйгээ илүү их ажиллаж, өөрийгөө сайжруулах болно. Өөрлүүгээ анхаарлаа хандуулснаар олны дунд орохоороо нөгөө өөрийгөө зовоогоод байдаг олон бодлуудаасаа сална. Энэ бодлуудаасаа салснаар чи амар тайван, аз жаргалтай байх болно. Чи өөрийгөө хайладаг уу?

Тиймээс өнөөдөр өөрөөсөө асуугаарай.
1. Би өөрийгөө хайрлаж байна уу?
2. Би өөртөө таалагдаж байна уу?
3. Би өөрийнхөө юу юунд дуртай вэ?
4. Би өөрийнхөө юу юунд дургүй вэ? Тэгээд эдгээр асуултуудад үнэнчээр хариулаарай.

http://www.ukatumur.com/%D1%87%D0%B8-%D3%A9%D3%A9%D1%80%D0%B8%D0%B9%D0%B3%D3%A9%D3%A9-%D1%85%D0%B0%D0%B9%D1%80%D0%BB%D0%B0%D0%B4%D0%B0%D0%B3-%D1%83%D1%83/