Э.Энхриймаа БНХАУ-ын тэргүүн хатагтай Пэн Лиюаньд захидал бичжээ

“Miss World 2018”/ “Дэлхийн мисс-2018”/ тэмцээнд Монгол Улсыг төлөөлөн оролцох гоо бүсгүйгээр шалгарсан Э. Энхриймаа өчигдөр /2018.11.12/ БНХАУ-ын Саньяа хотод очжээ.

Саньяа хотод очсон Э.Энхриймаа урьдчилсан шалгаруулалтын арга хэмжээнд идэвхтэй оролцож байгаагаа Miss World – Mongolia фэйсбүүк хуудсаар дамжуулан мэдээлжээ.

“Сүрьеэгүй Монгол” хүмүүнлэгийн төслийн ажлыг эхлүүлсэн Э.Энхриймаа сүүлийн гурван жилд гэр бүлийн хамтаар 50 сая төгрөгийн хандив тусламжийг хүүхэд, багачуудад үзүүлжээ.

Мөн БНХАУ-ын тэргүүн хатагтай Пэн Лиюаньд захидал бичиж, сүрьеэ өвчинтэй тэмцэх үйлстэй дуу хоолойгоо нэгтгэн ажиллах болно гэдгээ илэрхийлсэн байна.

 

Тэрбээр “Дэлхийн мисс-2018” тэмцээнд “Сайн ээж – сайхан дэлхий” уриалгыг дэвшүүлж оролцох юм.
“Сайн ээж – сайхан дэлхий” уриалгадаа зориулж монгол ээжүүдийн үр хүүхдээ сурган хүмүүжүүлж ирсэн шилдэг зөвлөгөөнөөс бүрдсэн “Хатан ухаант ээжүүдийн сургааль” цуврал номыг санаачлан хэвлүүлэн, олон нийтэд үнэгүй тараасан байна.

“Монголын сайхан бүсгүй-2018” наадмаас хүртсэн шагналынхаа 20 сая төгрөгөөр дөрвөн өнчин хүүхдэд хашаа, байшин худалдан авч өгч орон гэртэй болгож өгсөн юм.

“Miss World 2018” тэмцээний финалын шатны шалгаруулалт 12 дугаар сарын 8-ны өдөр БНХАУ-ын Саньяа хотноо зохион байгуулагдана.