Өглөө.мн Шинэ өглөө, Шинэ мэдээлэл
Азийн телевизийн салбарын шилдгүүдийг тодруулдаг “Asian Television Awards”наадам 23 дахь жилдээ энэ сарын 11-12-ны өдрүүдэд Малайз улсад зохион байгуулагдлаа.
Энэ жилийн наадамд Монгол Улсаас анх удаа “Mongol HD” телевизийн гурван нэвтрүүлэг дөрвөн номинацид нэр дэвшсэн. Тодруулбал, шилдэг энтертаймент нэвтрүүлэгт “The Voice of Mongolia”, шилдэг реалити шоуг нутагшуулсан контент төрөлд “Shark Tank”, Шилдэг хөгжөөнт нэвтрүүлэгт “Төрөх өрөөний тоглоом” зэрэг бүтээлүүд өрсөлдсөн юм.
Тэгвэл “Mongol HD” телевиз 23 дахь удаагийн Азийн телевизийн наадмаас “The Voice of Mongolia”шоу нэвтрүүлгээрээ шилдэг энтертаймент нэвтрүүлэг, шилдэг нутагшуулсан шоу гэсэн хоёр номинацийн шагнал хүртлээ.
Шагнал гардуулах ёслолд Moнгол HD телевизийн Гүйцэтгэх захирал Ч.Номин, Бодлого, төлөвлөлт эрхэлсэн дэд захирал Г.Бат-Эрдэнэ, Програм хариуцсан дэд захирал Б.Гантөмөр, тус телевизийн дуу, хөгжмийн продюсер, найруулагч С.Буянтөгс нар оролцжээ.
Азийн телевизийн наадмын шилдгүүдийг Ази тивийн өнцөг булан бүрээс сонгогдсон 60 шүүгч тодруулдаг бөгөөд сонгон шалгаруулалтад олон улсын аудитын “PWC” агентлаг хяналт тавьдаг аж.
Тус наадмыг 2016 оноос эхлэн 21 сувгаар шууд дамжуулах болжээ.Наадамд Өмнөд Солонгос, Хонконг, Тайвань болон Малайз, Индонези, Япон зэрэг улсын телевизүүд өрсөлддөг байна.
