Өглөө.мн Шинэ өглөө, Шинэ мэдээлэл
Нийслэлийн Засаг даргын Тамгын газрын байр болон Бодь цамхаг хоорондын зайнд байрлах хэсэг газарт өчигдөр 17:30 цаг орчимд гал гарсан байна. Тус хоёр барилгын хоорондын зайд Бодь цамхагийн агааржуулалтын системийн цахилгаан төхөөрөмж болон НЗДТГ-ын актлагдсан модон эдлэлүүд түр хураалттай байжээ.
Гал гарч, ахуйн эд зүйлс шатсаны улмаас НЗДТГ-ын байрны А корпусын 1-2 давхарын тухайн хэсэг рүү харж байрласан оффисын өрөөний хоёр цонхны шил хагарсан бөгөөд хүний амь нас, эрүүл мэндэд хор хохирол учраагүй, түлэгдэж бэртсэн, угаартсан хүн байгаагүй. Мөн эд хөрөнгөнд ноцтой хэмжээний хохирол учраагүйг албаны хүмүүс мэдээллээ.
Галын дуудлага авсан даруйд Гал унтраах, авран хамгаалах 10-р ангийн алба хаагчид болон Чингэлтэй дүүргийн Цагдаагийн газрын бие бүрэлдэхүүн ирж барилгын гадна талыг хамгаалалтад авч, гал унтраах арга хэмжээг шуурхай авснаар галыг бүрэн унтраасан байна.
Нийслэлийн Засаг даргын тамгын газраас гал гарсан асуудалтай холбогдуулан мэдэгдэл гаргажээ.
Өчигдөр оройны 17:30 цагийн орчимд НЗДТГ-ын захиргааны байр болон Бодь цамхаг хоорондын хэсэг газарт гарсан галыг мэргэжлийн байгууллага дотогш нэвтрүүлэлгүй унтраасан тул НЗДТГ-т эд хөрөнгийн хохирол учраагүй, албан бичиг баримт шатаж сүйдээгүй болохыг албан ёсоор мэдэгдэж байна pic.twitter.com/abj9tHWxLh
— НЭЭЛТТЭЙ УЛААНБААТАР (@UlaanbaatarMng) March 19, 2019
Нийслэлийн Засаг даргын тамгын газрын галд өртсөн дээрх хоёр өрөөнөөс бусад хэсэгт гал тархаагүй, хохирол учраагүй тул өнөөдөр нийслэлийн Засаг даргын Тамгын газрын үйл ажиллагаа хэвийн үргэлжилж байна.
