Өглөө.мн Шинэ өглөө, Шинэ мэдээлэл
Кино найруулагч Б.Мартын бүтээл болох “Нүүдэлчдийн өрхийн эмч” баримтат кино дөрөвдүгээр сарын 25-наас 28-ны өдрүүдэд АНУ-д зохион байгуулсан “Jim Thorpe” Олон улсын кино наадмын “Оюутны Шилдэг Баримтат Кино”-гоор шалгарчээ.
“Нүүдэлчдийн өрхийн эмч” баримтат кино нь өнгөрөгч оны аравдугаар сард Холливудын Олон улсын баримтат кино наадамд “Шилдэг оюутны кино” төрөлд түрүүлсэн билээ.
“Нүүдэлчдийн өрхийн эмч” киноны найруулагчаар Б.Март ажиллаж, зураглаачаар Б.Лхагвадорж, Б.Санжид, дууны оператороор Н.Бямбацогт нар ажиллаж эвлүүлэг, дуу оруулалтыг Английн киноны мэргэжлийн хүмүүс гүйцэтгэсэн аж.
Найруулагч Б.Март “Нүүдэлчдийн өрхийн эмч” киногоороо Их Британий Хердфордшир их сургуульд кино, телевизийн урлагаар магистрын зэрэг хамгаалсан байна.
Дундговь аймгийн Өндөр шил сумын өрхийн эмч өдөрт 10-100 км зам туулж, өдөр шөнө, өглөө орой, өвөл зуны улирал үл хамааран машин эсвэл морь, тэмээ унаад сумын иргэдэд эрүүл мэндийн тусламж үйлчилгээ үзүүлдэг тухай “Нүүдэлчдийн өрхийн эмч” баримтат кино өгүүлнэ.
