“Монгол цэрэг энхийн төлөө” цогцолборын шав тавьжээ

“Энхийг сахиулагчдын олон улсын өдөр”-ийг тохиолдуулан Үндэсний цэцэрлэгт хүрээлэнд “Монгол цэрэг энхийн төлөө” цогцолборын шав тавилаа.

Өчигдөр болсон хөшөө цогцолборын шав тавих ёслолд Батлан хамгаалахын дэд сайд Т.Дуламдорж, ЗХЖШ-ын дарга хошууч генерал А.Ганбат, ЗХЖШ-ын ажиллагааны удирдлагын газрын дарга бригадын генерал Д.Ганзориг болон энхийг сахиулагчид, ЗХЖШ-ын албаны төлөөлөгчид оролцов.

Монгол Улс энэхүү өдрийг 2005 оноос тэмдэглэж ирсэн бөгөөд албан ёсоор Монгол Улсын Засгийн газрын 2012 оны дөрөвдүгээр сарын 25-ны өдрийн 140-р тогтоолоор баталгаажуулсан байдаг.
Энэ жил НҮБ-ын “Энхийг сахиулагчдын олон улсын өдөр”-ийг “Энгийн иргэдийн энхийг хамгаалах” уриан дор зохион байгуулахаар НҮБ-аас уриалж байгаа юм.