Цагдан хорих 461 дүгээр ангиас оргосон С.Төмөрийг Замын-Үүдээс баривчиллаа

Хорих 461-р ангиас хоёр өдрийн өмнө оргосон С.Төмөрийг Замын-Үүдээс өнөөдөр /2019.06.21/ өглөө баривчиллаа. Тэрбээр Эрүүгийн хуулийн тусгай ангийн 12.1 дүгээр зүйлийн 4 дэх хэсэгт заасан гэмт хэрэгт холбогдож, 2019 оны 05 дугаар сарын 03-ны өдрөөс яллагдагчаар татагдан, Цагдан хорих 461 дүгээр ангид хоригдож байсан С.Төмөр нь 06 дугаар сарын 19-ний өдрийн 19.00 цагийн үед тус ангийн байрлалаас оргосон юм.

Түүнийг өнөөдөр 06:00 цагийн үед Дорноговь аймаг дахь Замын-Үүд боомтоор ачааны вагонд нуугдан, хил гарах оролдлого хийх үeдээ Төмөр замын цэрэгжүүлсэн харуулын ажилтнуудад баригджээ. Замын-Үүдийн Цагдаагийн хэлтэст С.Төмөрийг саатуулаад байна. С.Төмөр нь Сэлэнгэ аймгийн Зүүнбүрэн сумын харьяат, бүрэн дунд боловсролтой 25 настай бөгөөд гурван удаагийн ял шийтгэлтэй.

• 2013 онд Эрүүгийн хуулийн 145.2-д зааснаар нэг жил дөрвөн сар
• 2014 онд Эрүүгийн хуулийн 145.2, 153.1-д зааснаар гурван жилийн ял авч байжээ.
• Эрүүгийн хуулийн 145 дугаар зүйл Бусдын эд хөрөнгийг хулгайлах, 153 дугаар зүйл Бусдын эд хөрөнгийг санаатайгаар устгах, гэмтээх тухай зүйлчилсэн байдаг.