Өглөө.мн Шинэ өглөө, Шинэ мэдээлэл
Швейцарын Холбооны Улсын Локарно хотноо 2019 оны наймдугаар сарын 7-17-ний өдрүүдэд 72 дахь удаагийн Локарно олон улсын кино наадам болж байна. Энэхүү наадамд Монголын кино уран бүтээлчид оролцож байгаа юм.
Локарно кино наадмын “Нээлттэй хаалга” хөтөлбөрийн захирал хатагтай Софи Бурдон нь 2018 оны 10-р сард болсон “Улаанбаатар” олон улсын кино наадамд оролцож, манай кино уран бүтээлчдэд зориулсан сургалтыг удирдан явуулах үеэрээ 2019-2021 онд тус хөтөлбөр нь Зүүн Өмнөд Ази болон Монгол Улсыг онцлон дэмжих болсноо зарласан юм.
Өнгөрсөн онд Швейцар Улсын Фрибург хотноо Швейцарын хөгжлийн агентлагийн дэмжлэгтэйгээр зохион байгуулагдсан 32 дахь удаагийн Фрибургийн олон улсын кино наадмын “Шинэ газар нутаг” хөтөлбөрийн хүрээнд Монгол Улс мөн онцлох улсаар сонгогдож байсан билээ.
Энэ удаагийн Локарно кино наадмаар “Нээлттэй хаалга” хөтөлбөр нь
- “Open doors hub”,
- “Open doors lab”
- “Open doors screening” гэсэн гурван хэсгээс бүрддэг аж.
Локарно кино наадмын хүрээнд Монголын кино уран бүтээлчид тус наадмын Ерөнхийлөгч Марко Соларитай уулзаж, “Нээлттэй хаалга” хөтөлбөрийн дугуй ширээний ярилцлагад Монголын урлагийн зөвлөлийн удирдах зөвлөлийн гишүүн, продюсер Ц.Ариунаа оролцов.
Манай кино уран бүтээлчдийг Локарно кино наадамд оролцохыг Швейцарын хөгжлийн агентлагаас дэмжсэн бөгөөд энэ оны 10 сард болох “Улаанбаатар” олон улсын кино наадмыг Швейцарын талаас мөн дэмжин оролцохоо мэдэгдээд байна. Локарно олон улсын кино наадмын үйл ажиллагаа энэ сарын 17 хүртэл үргэлжилнэ.
