Өглөө.мн Шинэ өглөө, Шинэ мэдээлэл
СOVID-19 буюу шинэ коронавирусийн дэгдэлт 2020 оны 2-р сарын 27-ны өдрийн байдлаар дэлхийн 50 гаруй улсад бүртгэгдэж, халдвар авсан иргэдийн тоо хэдийнээ 80 мянга дөхжээ. Харин нас барагсдын тоо 2700 хол даваад байгаа юм.
Тэгвэл Нийгмийн Ардчилал Монголын Эмэгтэйчүүдийн Холбоо /НАМЭХ/ нийгмийн хариуцлагынхаа хүрээнд аймаг, дүүргийн салбар холбоодын 100 мянга гаруй гишүүдийнхээ хүчээр өөрсдөө амны хаалт хийх уриалгыг гаргалаа.
Ингэснээр НАМЭХ-ны гишүүд санаачилгаараа стандартын шаардлага хангасан, хөвөн даавуун материалаар угааж ариутган дахин хэрэглэж болох амны хаалтыг хийж, эрүүл мэндийн байгууллагуудаар дамжуулан шаардлагатай байгаа албан байгууллага, иргэдэд хандивлах ажлыг үндэсний хэмжээнд эхлүүллээ.
Ийнхүү НАМЭХ-ноос 21 аймаг 9 дүүргээ амны хаалт хийх уриалгад нэгтгэснээр зөвхөн сар шинийн баярын эхний өдрүүдэд 5 000 ширхэг амны хаалт хийгээд байна.
Цаашдаа энэ ажил улам эрчимжиж, хийсэн амны хаалтаа аймаг, дүүргүүдийн эрүүл мэндийн байгууллагуудад хандивлах ажил хүрээгээ тэлнэ гэдгийг НАМЭХ-ны удирдлагууд хэлж байна.
Монгол Улсын Засгийн газраас хагас өндөржүүлсэн бэлэн байдлын зэрэгт шилжин, урьдчилан сэргийлэх бүх л арга хэмжээг шуурхай авч, хэрэгжүүлж байгаа. Халдвараас урьдчилан сэргийлэх энэ хариуцлагатай цаг үед иргэн бүр амны хаалтыг өдөр тутам зүүх шаардлага тулгарч байгаа хэдий ч дэлхий нийтэд амны хаалт хомсдож, зарим улс орон экспортод гаргахаа хориглосон.
Тиймээс НАМЭХ-ноос аймаг, дүүргийн салбар холбооддоо хандан уриалга гаргаж, СOVID-19 буюу шинэ коронавирусийн халдвараас урьдчилан сэргийлэх эрүүл нийгэм, хайртай хүмүүсийнхээ төлөө амны хаалт өөрсдөө хийж нийлүүлэхийг хүсч байгаа нь цаг үеэ олсон зөв зүйтэй ажил юм.
