Д.Нямхүү: Афганистанаас ирсэн 25 хүнд коронавирусийн халдвар илэрлээ

ЭМЯ-наас коронавирусийн халдварын нөхцөл байдлын талаарх цаг үеийн ээлжит мэдээллээ хийлээ. Энэ үеэр эмчилгээнд байгаа иргэдийн талаарх мэдээллийг ХӨСҮТ-ийн захирал Д.Нямхүү өглөө.

Тэрбээр “2020 оны долдугаар сарын 17-нд ХӨСҮТ, Дархан-Уул аймгийн, ЗӨСҮТ-ийн лабораторид нийт 555 хүний сорьцод шинжилгээ хийхэд 530-д нь коронавирус илрээгүй. Харин 25 хүний сорьцод коронавирусийн халдвар илэрлээ. Эдгээр хүмүүс нь Афганистанаас ирсэн дайчид. Афганистанаас 113 дайчин эх орондоо ирснээс 53-аас нь коронавирус илрээд байна. Давтан шинжилгээ хийнэ.

Халдвар илрээгүй тохиолдлуудыг задалж танилцуулбал:

-Долдугаар сарын 15-нд Сөүл-Улаанбаатарын онгоцоор ирсэн 182 хүний сорьцоос коронавирус илрээгүй.

-Эх орон руугаа буцаж байгаа БНХАУ-ын 240 иргэнээс илрээгүй

-Алтанбулагийн боомтоор орж ирсэн ачаа тээврийн 23 жолоочоос илрээгүй.

-Сэлэнгэ аймагт тусгаарлагдсан 2 хүнээс илрээгүй.

-Тандалтын зорилгоор хийсэн 9 сорьцоос илрээгүй. /Дорноговь аймгийн Замын-Үүд сумын нэгдсэн эмнэлэг, Баянгол дүүргийн нэгдсэн эмнэлгээс сорьцыг сонгон авсан.

-ХӨСҮТ-д тусгаарлагдсан 28 хүний давтан шинжилгээнээс коронавирус илрээгүй.

Монгол Улсад коронавирусийн халдварын батлагдсан тохиолдол 287 боллоо. Үүнээс эдгэрсэн 211, эмчилгээнд 76 хүн байна” гэж мэдэгдлээ.