Өглөө.мн Шинэ өглөө, Шинэ мэдээлэл
Шинэ коронавирусний вакциныг шударгаар түгээх тухай Дэлхийн эрүүл мэндийн байгууллагын санаачилсан хөтөлбөрт 167 улс орон, нутаг дэвсгэр нэгдлээ гэж тус байгууллагын тэргүүн Тедрос Адханом Гербейесус мэдэгдлээ.
Т.Гебрейесус НҮБ-ын Ерөнхий Ассамблейн чуулганы үеэр үг хэлэх үеэрээ дэлхий даяар халдварын улмаас нас барсан хүний тоо нэг сая давсныг онцолжээ. Мөн тэрбээр бодит тоон үзүүлэлт илүү өндөр байгаа нь тодорхой хэмээгээд, цар тахалтай тэмцэх чиглэлд хамтын хүчин чармайлт гаргахыг дэлхий дахинд уриалжээ.
Дэлхийн нийт хүн амын 70 орчим хувийг хамарсан 167 улс орон, нутаг дэвсгэр лхагва гаргийн байдлаар вакцины хөтөлбөрт нэгдсэн бөгөөд энэхүү жагсаалт өдөр ирэх тусам өргөжиж байгаа юм. Япон улсын хувьд уг санаачилгад нэгдээд байгаа бол АНУ, БНХАУ элсээгүй байгаа ажээ.
Мөн Т.Гебрейесус вакцины их хэмжээний нөөцтэй болохыг эрмэлзсэн зарим улс орны үйлдлийг эсэргүүцэж байгаагаа илэрхийлээд, вакцины санаачилгад илүү их санхүүжилт зориулахыг уриалжээ.
