Өглөө.мн Шинэ өглөө, Шинэ мэдээлэл
Эрүүл мэндийн сайдын Зөвлөх, Анагаах Ухааны Доктор, Шадар сайдын дэргэдэх эрдэмтдийн зөвлөлийн гишүүн О.Чимэдсүрэн Ковид-19 халдварын нөхцөл байдлын талаар мэдээлэл хийлээ.
Тэрээр мэдээлэлдээ: Өнөөдрийн 17 цагийн байдлаар Монгол Улсад 1362 дотоодын халдвар илэрснээс 889 нь эдгэрч, ХӨСҮТ-д 232, Цэргийн төв эмнэлэг 210, Сэлэнгэ аймгийн нэгдсэн эмнэлэгт 13, ЭНЭҮТ-II-т 7 хүн тус тус хэвтэн эмчлүүлж байна. Эрүүл мэндийн салбарт Ковид-19 халдварын эмнэлгийн тусламж, үйлчилгээнд зориулж бэлдсэн орны нөөцийн 9.5 хувийг одоо ашиглаж байгаа учраас орны нөөц хангалттай гэв.
ДЭМБ-аас 28 хоног халдварын голомтоос халдвар гараагүй тохиолдолд идэвхжил нь зогслоо гэж үздэг. Өнөөдрийн байдлаар идэвхжиж байгаа голомт нь Сүхбаатар аймгийн Сэлэнгэ сум байна. Тус суманд сүүлийн 16 хоног өвчлөл гараагүй явж байна. Сэлэнгэд хэрэгжүүлсэн арга хэмжээг үр дүнтэй байна гэж үзэж байна. Сэлэнгэ сумын хувьд эхний ээлжид халдвар нэг хүнээс найман хүнд халдварладаг байсан бол ЭМЯ, АОК-оос хариу арга хэмжээ шуурхай авсны үндсэн дээр халдварлуулах индекс буурч голомт намжмал байдалтай байна.
ЭМЯ-аас ард, иргэддээ авч хэрэгжүүлж буй халдвар хамгааллын дэглэмийг мөрдсөнөөр хэрхэн үр дүн гарсан талаар товч танилцуулъя.
Тухайлбал, амьсгалын замын өвчин жил болгон өвчлөл өндөр байдаг. Тус өвчлөл 10 мянган хүн ам тутамд 2018 онд 60.4 хувьтай, 2019 онд 66.2 хувьтай байсан бол бид амны хаалт зүүж, гараа ариутган, хүн хоорондын зай барьснаар 12.5 хувь болтол бууруулж чадсан юм.
Нөгөөтэйгүүр Засгийн газар, ЭМЯ-аас ковидтой зэрэгцэн томуу, томуу төст өвчин идэвхжихээс урьдчилан сэргийлэн 2020 онд томуугийн вакцинд 600 мянга орчим зорилтот бүлгийн иргэдээ хамруулсан нь ихээхэн үр дүнгээ өгсөн юм.
Монгол Улс өнөөдрийн байдлаар хүн амынхаа 20 хувийг буюу 600 гаруй мянган хүнийг шинжилгээнд хамруулсан байна. Өчигдөр буюу нэгдүгээр сарын 06-ны өдөр нийслэлийн хэмжээнд 15191 иргэнийг PCR шинжилгээнд хамруулаад байна.
Үүнээс Баянзүрх дүүрэгт 3832, Сонгинохайрхан дүүрэгт 2832, Сүхбаатар дүүрэгт 2331, Баянгол дүүрэгт 2219, Хан-Уул дүүрэгт 2204 гэх мэт шинжилгээ хийлээ.
Олон улсад шинжилгээнд хамруулах 4 төрлийн бодлого хэрэгжиж байна
Дэлхийн улс орнууд Ковид-19 халдварын шинжилгээн дээр дараах 4 бодлогыг барьж байна. Нэгдүгээрт, шинжилгээний бодлогогүй, хоёрдугаарт шинж тэмдэгтэй болон зорилтот бүлгийг шинжлэх, шинж тэмдэгтэй хүн бүрийг хамруулах, дөрөвдүгээрт олон нийтэд нээлттэй буюу сайн дурын гэсэн бодлогуудыг улс орнууд өөр өөрийн онцлог, туршлага дээр үндэслэн хэрэгжүүлж байна.
