БГД:Сууц өмчлөгчдийн холбоодтой хамтран ариутгал халдваргүйтгэлийн ажлыг зохион байгуулна

• 

Баянгол дүүргийн Засаг дарга Ө.Сумъяабаатар өчигдөр /2021.01.21/ Монголын сууц өмчлөгчдийн холбоодын дээд зөвлөлийн Гүйцэтгэх захирал М.Галбаатар, тэргүүлэгч гишүүдийн төлөөлөл, Баянгол дүүргийн “Эвсэг” салбар зөвлөлийн дарга нарыг хүлээн авч уулзлаа.

• 

Баянгол дүүргийн нутаг дэвсгэрт өнөөгийн байдлаар 750 байр, 240 орчим Сууц өмчлөгчдийн холбоо үйл ажиллагаа явуулдаг бөгөөд нийт 1000 орчим ажилтан өдөр тутам ажиллаж байна.

Иймд Коронавируст /ковид-19/ цар тахлын улмаас хорио цээрийн дэглэм баримтлан ажиллаж, амьдарч буй нийт оршин суугчид, үйлчилгээний ажилтнуудын халдвар хамгааллын асуудалд анхаарч, хойшид нягт хамтран ажиллах талаар талууд санал солилцсон.

Үүнд:

-СӨХ-ны ажилтнуудыг давтан шинжилгээнд хамруулах

-Орон сууцуудад ариутгал халдваргүйтгэлийн ажлыг үргэлжлүүлэн, шат дараатай зохион байгуулах нэгдсэн арга зүйгээр хангах, төгөлдөржүүлэх

-Засаг даргын Тамгын газраас ариутгал, халдваргүйтгэл хийх зориулалт бүхий зарим эд материалийн дэмжлэг үзүүлэх

-Хойшид хамтран ажиллах санамж бичиг, жилийн ажлын төлөвлөгөө боловсруулан, дүгнэж ажиллах

-Коронавируст /ковид-19/ цар тахлаас урьдчилан сэргийлэх, болзошгүй эрсдэлээс хамгаалах чиглэлээр СӨХ-ны үйл ажиллагаанд мөрдлөг болгох зөвлөмжийн төсөл боловсруулж, мэргэжил арга зүй, удирдлагаар хангах чиглэлээр хамтран ажиллахаар тогтлоо.