Өглөө.мн Шинэ өглөө, Шинэ мэдээлэл
Улаанбаатар хотын утааг бууруулах, хүн амын төвлөрлийг сааруулж, иргэдэд ээлтэй орчин бүрдүүлэхэд хамгийн чухал түлхэц үзүүлэх ажил бол орон сууцыг нэмэгдүүлэх гэхэд хилсдэхгүй. Өдгөө манай улсын нийт өрхийн 45.8 хувь буюу 1.448.642 хүн нийслэлд байгаагаас олонх нь гэр хороололд амьдардаг.
Тиймээс гэр хорооллын төвлөрлийг бууруулж, орон сууцыг нэмэгдүүлэх чиглэлээр Засгийн газраас багагүй ажил хийхээр төлөвлөсөн. Эдгээрээс “Залуус 1, 2, 3” хорооллыг барих төсөл иргэдийн анхаарлыг ихээхэн татаад байна.
Барилга, хот байгуулалтын яамны дэд сайд Э.Золбоотой энэ талаар ярилцлаа.
-Засгийн газраас “Залуус-1” хорооллыг барихаар төлөвлөөд буй. Эл хорооллыг хаана барих вэ?
-Улаанбаатар хотын хүн амын төвлөрлийг сааруулах, шинэ суурьшлын бүсийг хөгжүүлэх, иргэдийн орлогод нийцсэн орон сууцыг санал болгох үүднээс “Залуус-1” хорооллыг барихаар болсон. Эл хотхоныг Улаанбаатар хотын Хан-Уул дүүргийн 21-р хорооны нутагт байрлах 57 га талбайд барина. Тэнд 5616 айл аж төрөх боломжтой. Эрчим хүчний хэмнэлттэй орон сууц, үйлчилгээний байгууламж, спорт комплекс, мэдээлэл технологийн парк, төрийн зарим байгууллагыг тэнд төвлөрүүлэхээр зорьж буй. Одоогоор “Залуус-1” орон сууцын хорооллын техник, эдийн засгийн урьдчилсан судалгаа, эх загвар зураг боловсруулах зөвлөх үйлчилгээний ажлын даалгаврыг холбогдох байгууллагуудтай хамтран зохион байгуулж байна.
-Дэд бүтцийн зохион байгуулалтын ажил судалгааны шатандаа яваа байх нь. Хэзээ ажил хэрэг болох бол?
-“Залуус-1” хорооллын инженерийн дэд бүтэц, цэвэр, бохир ус, цахилгаан, холбоо дохиолол зэргийг хотын төвлөрсөн системд холбоно. Өнөөдрийн байдлаар дулааны асуудлыг хэрхэн шийдвэрлэх талаараа ярилцаж байна. Тус газрын одоогийн хүчин чадалд нийцүүлбэл 1.000 орчим айлыг төвлөрсөн дулааны системд холбох боломжтой юм. Бусад төлөвлөсөн өрхийг дулаанаар хангахын тулд бие даасан станц барихаар судалж байгаа. Барилгын зураг, техник эдийн засгийн үндэслэл зэргийг боловсруулах ажлыг энэ онд багтаан дуусгана. Харин барилга угсралтын ажлыг 2022 оны хавар эхлүүлнэ.
–Иргэдийн сэтгэлийг хамгийн их чилээдэг асуудал бол байрны урьдчилгаа төлбөр, банкны шалгуур үзүүлэлт байдаг. Ямар нөхцөл, шаардлага хангасан хүмүүс эл орон сууцад орох вэ?
-Шалгуур үзүүлэлтийн асуудал одоогоор судалгааны шатанд явж буй. Иргэдээ хөнгөлөлттэй нөхцөлөөр орон сууцжуулсан, хэрхэн, ямар журмаар ийм төрлийн хөтөлбөрт хамруулсан талаарх бусад улсын туршлагыг судалж байна. Төрийн зүгээс залуучуудад хямд үнэ, тохилог орчинтой орон сууцыг санал болгох ажлыг чухалчилж байгаа учир нийслэлд тулгамдсан бусад асуудлыг ч хамтад нь шийдвэрлэхээр хичээнэ. Тухайлбал, орон сууцтай болох хүсэлтэй ч урьдчилгаа 30 хувиа төлөх мөнгөгүй иргэдийг түрээслээд өмчлөх хэлбэрээр байртай болгох, хотын төвлөрлийг сааруулах, түгжрэл, утаа зэрэг асуудлуудыг шийдэх бодлогыг “Залуус-1” хороололд амьдрах иргэдээр төлөөлүүлэн гүйцэтгэх бодолтой байна. Мөн хотын төвлөрөл, утааг тодорхой хэмжээнд багасгах зорилгоор гэр хорооллын зарим байршлуудын газрыг ач холбогдлоор нь сонгон авч, тухайн нутаг дэвсгэрт амьдарч байгаа иргэдийн өмчилсөн газрыг “Залуус-1” хорооллын орон сууцаар солих зэрэг ажлыг хийхээр төлөвлөж байгаа. Ингэж сольсон газарт нийслэлд хамгийн их дутагдаад байгаа цэцэрлэгт хүрээлэн, ногоон байгууламж болон спортын талбай барих нь зөв шийдвэр болно. Энэ мэтчилэн олон асуудлыг нарийн судалж үзсэний дараа тооцоотой, зөв зүйтэй шийдвэрийг гаргаж, иргэдээ энэ хөтөлбөрт хамруулна.
–Яармагийн зам ачааллаа дийлэхгүй байгаа. “Залуус-1” хорооллыг тус байршилд барихаар төлөвлөсөн нь түгжрэлийг улам л нэмэгдүүлэх юм биш үү. Замын асуудлыг хэрхэн төлөвлөж байгаа вэ?
-Улаанбаатар хот урдаасаа хойд чиглэл дагуу барилга барих газаргүй болсон. Хотын зүүн чиглэлд газар нь цэвдэгтэй учир барилга барихад хэцүү, баруун тийшээ л тэлэх боломжтой. Үүнийг дагаад Яармагийн зам үнэхээр ачааллаа дийлэхээ больсон. Тийм учраас бид “Залуус-1” хорооллыг цогцоор нь харж, шинээр зам тавих ажилтай уялдуулан төлөвлөсөн. Одоогийн байдлаар тус хороолол чиглэлд тавих замын хэд хэдэн хувилбарыг ярилцаж байгаа. Жишээлбэл, Энхтайваны өргөн чөлөөнөөс Нүхтийн авто зам хүртэл таван километр босоо чиглэлийн зам тавих боломжтой гэж үзсэн. Зорчигчид заавал Яармагийн гүүрээр давах шаардлагагүй болж, ачаалал буурна. Мөн Баянзүрхийн гүүрнээс Сонсголонгийнхыг нэвт гарах, Туул голыг дагасан 36 км урттай замын зураг бэлэн болсон. Энэ нь ач холбогдол өндөртэй зам байх болно. Хэрэв энэ замыг тавьчихвал Энхтайваны өргөн чөлөөний замаас гадна Улаанбаатар хотыг хөндлөн чиглэлд нэвт туулах боломжтой бас нэг гол замтай болно гэсэн үг. Ингэснээр хотын түгжрэлийг дор хаяж, 30 хувиар бууруулах боломжтой гэсэн тооцоо гарсан. Эдгээр замыг тавих асуудлыг шийдвэрлэхээр манай яам болон нийслэлийн удирдлагад хамтран ажиллаж байна.
-“Залуус-1” хорооллыг нийслэлийн хүн амын төвлөрлийг бууруулах зорилгоор барих гэж буй. Тэгвэл тэнд амьдрах иргэдийн ажлын байр, хүүхдүүдийн сургууль, цэцэрлэгийг хэрхэн шийдвэрлэх юм бол?
-Тус хорооллын төлөвлөлтийг хийхдээ худалдаа үйлчилгээний болон бусад нийгмийн бүхий л шаардлагатай үйлчилгээ авах газруудыг барих, ажлын байр бий болгох зэргийг харгалзан үзэж байгаа. Тэндхийн оршин суугчдыг аль болох хот руу орж ирэхгүйгээр ажил, амьдралаа зохицуулах орчин нөхцөлөөр хангах боломжийг бүрдүүлэхэд ихэд анхаарч, зах зээлийн бусад асуудлуудтай хамтад нь цогцоор шийдвэрлэхийг зорьж, төлөвлөж байна. Тухайлбал, хүүхдүүд хороолол орчимдоо цэцэрлэг, сургуульд хамрагдах, иргэдийн ажлын байрыг тэнд нь бий болгох, нэг цэгээс төрийн бүхий л үйлчилгээг авах, эмнэлэг, номын сан, спорт цогцолбороор үйлчлүүлэх зэргийг цогцоор нь шийдэхээр төлөвлөж байна. Ингэснээр 5616 айл буюу ойролцоогоор 20.000 орчим иргэн заавал хотын түгжрэлд орохгүйгээр ажиллаж, амьдрах таатай нөхцөл бүрдэх юм.
Эх сурвалж: www.unuudur.mn
