Иргэний үзэл бодлоо илэрхийлэх эрхэнд халдсан талаарх гомдлуудыг Хүний эрхийн дэд хороогоор нээлттэй хэлэлцэнэ

Улсын Их Хурлын дэд дарга С.Одонтуяа, Улсын Их Хурлын гишүүн Д.Цогтбаатар нар Улсын Их Хурлын Хүний эрхийн дэд хороог хуралдуулах бэлтгэл ажлын хүрээнд энэ сарын  19-ний өдөр холбогдох хүмүүстэй уулзаж, санал солилцлоо.

Улсын Их Хурлын дарга Г.Занданшатар хүний эрхийн зөрчилтэй холбоотой асуудлуудыг судалж шийдвэрлэх, эрх нь зөрчигдсөн иргэдийн талд холбогдох арга хэмжээг авч ажиллах чиглэлээр хугацаатай үүрэг өгсний дагуу уг уулзалтад Хүний эрхийн үндэсний комиссын дарга Ж.Хунан, Монголын өмгөөлөгчдийн холбооны гишүүн өмгөөлөгч Ч.Мөнхсайхан болон албаны хүмүүс оролцсон юм.

Уулзалтын эхэнд Улсын Их Хурлын дэд дарга С.Одонтуяа, хүний эрхийн дэд хорооны хуралдаанаар үг хэлэх, үзэл бодлоо илэрхийлэх заяагдмал эрхийг зөрчиж, баривчлах, цагдан хорих ажиллагаа явуулсан хэд хэдэн тохиолдлуудыг авч хэлэлцэн, сонсох ажиллагаа явуулах саналтай байгаагаа онцлов. Түүнчлэн, эрх нь зөрчигдсөн иргэдийг хамгаалж, цаашид хууль эрх зүйн орчинг илүү боловсронгуй болгохын тулд уг хуралдаанаар тогтоолын төсөл боловсруулж танилцуулах учраас төр, иргэн, олон нийтийн байгууллагын жигд төлөөллийг оролцуулах хэрэгтэй гэж дурдлаа.

Үргэлжлүүлэн Улсын Их Хурлын гишүүн Д.Цогтбаатар хэлэхдээ, үг хэлэх, үзэл бодлоо илэрхийлэх эрх чөлөө нь өнөөгийн нийгмийн тогтолцооны суурь ухагдахуун гэдгийг тодотгоод, аливаа хүний эрхийн зөрчил бол авлигаас илүү хор уршиг дагуулдаг тул уг асуудалд Хүний Эрхийн Үндэсний Комисс манлайлж ажиллах ёстой гэв.

Хүний Эрхийн Үндэсний Комиссын дарга Ж.Хунан, өнгөрсөн хоёр жилийн хугацаанд үг хэлэх, хэвлэн нийтлэх, жагсаал цуглаан хийх эрхийн зөрчилтэй холбогдуулан ял шийтгэл оноосон хэргүүдийг нэг бүрчлэн судалж ажилласан гэдгийг уулзалтын үеэр дурдсан юм. Тэрбээр үргэлжлүүлэн, эдгээрээс цагдан хорьсон 102 иргэнийг хорих ангийн даргын шийдвэрээр сулласан бол дийлэнх буюу 98% нь шүүх, прокурорын шийдвэргүйгээр эцэслэгдсэн гэдгийг нэмж тодотгов.

Өмгөөлөгч Ч.Мөнхсайханы хувьд, жагсаал цуглаан хийх журмын тухай хуульд өөрчлөлт оруулах шаардлагатай хэмээн байр сууриа илэрхийлсэн юм. Тодруулбал,  уг хуулийн 10 дугаар зүйлд “жагсаал цуглаан хийх мэдэгдлийг хянах” гэж заасан нь хүний заяагдмал эрхэнд халдах үндэслэл болж байна гэлээ. Энэ оны байдлаар Хүний Эрхийн Үндэсний Комисст үзэл бодлоо илэрхийлэх эрх чөлөөнд халдсан талаарх гомдол Д.Монголхүү, Э.Одбаяр, Д.Мөнх-Эрдэнэ нарын 4 иргэнээс иржээ. Улсын Их Хурлын Хүний эрхийн дэд хорооны хуралдаанаар эдгээр иргэдийн гомдлыг нээлттэй сонсож, хэлэлцэх юм