Өглөө.мн Шинэ өглөө, Шинэ мэдээлэл
Өнөөдөр Авлигатай тэмцэх газраас шалгагдаж буй хэргүүдийн явцын талаар мэдээлэл хийлээ.
Энэ үеэр АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн “Ногоон автобусны гэх хэрэг дээр мөрдөн шалгах ажиллагаа явагдаж байгаа. Уг хэрэгтэй холбоотойгоор Монгол Улсын сайд асан Ж.Сүхбаатарт Эрүүгийн хэрэг үүсгэж, яллагдагчаар татах саналтайгаар Нийслэлийн прокурорын газарт хүргүүлсэн. Одоогоор прокурорын яллагдагчаар татсан тогтоол гараагүй байна.
Албан тушаалын байдлаа урвуулан ашиглаж бусдад давуу байдал бий болгосон байж болзошгүй гэсэн үндэслэлээр яллагдагчаар татах саналыг хүргүүлсэн. Нийслэлийн Засаг дарга асан Д.Сумъяабазарыг яллагдагчаар татах саналыг хүргүүлээгүй. Гэхдээ мөрдөн шалгах ажиллагаа явагдаж байгаа.
Автобусны хэрэгтэй холбоотойгоор нийтдээ 26 хүнийг яллагдагчаар татсан байгаа. Үүнд нийтийн албан тушаалтан 18, гадаад улсын иргэн дөрөв, хуулийн этгээдийн албан тушаалтан дөрөв байна”гэж мэдэгдлээ.
