Өглөө.мн Шинэ өглөө, Шинэ мэдээлэл
Дэлхийд алдартай Олон улсын “Нарны цирк”-ийн жүжигчин, Монгол Улсын уран нугараач С.Оюун-Эрдэнэ 30 секундийн хугацаанд уран нугаралтын суниалтыг тусгай шалгуурын дагуу хамгийн олон удаа буюу 28 удаа гүйцэтгэснээс 24-ийг тооцсоноор Гиннесийн дээд амжилтыг шинэчлэн тогтоолоо. Өмнөх дээд амжилт нь 21 удаа суниасан байдаг юм байна.
Жүжигчин С.Оюун-Эрдэнэ 6 настайгаасаа уран нугаралтаар хичээллэж олон улсын “Нарны цирк”-т 20 гаруй жил ажиллаж байна.
Түүнтэй хамт тус циркийн акробатчин Люси (Lucie) гар дээрээ хойшоо хамгийн олон үсэрсэн (back handsprings) үзүүлбэрийг гүйцэтгэж Гиннесийн дээд амжилтыг шинэчилсэн байна.
Гиннесийн дээд амжилтын шүүгч Меган Брюс хэлэхдээ: “Би “Нарны цирк”-ийн жүжигчид сайн гэдгийг мэдэж байсан, гэхдээ эдгээр амжилтыг биечлэн болон ойроос харах нь огт өөр зүйл байсан. С.Оюун-Эрдэнийн үзүүлсэн уян хатан байдал, дээд биеийн хүч нь намайг гайхшируулсан. Бие бялдрын хувьд маш их ачаалалтай дээд амжилтыг эвдсэн жүжигчиндээ баяр хүргэе” гэжээ.
Уран нугараач С.Оюун-Эрдэнэ “Нарны цирк”-ийн Лондон хотын алдарт Рояль Алберт Холл театрт 2024 оны нэгдүгээр сарын 11-ээс гуравдугаар сарын 3-ны өдрүүдэд шинэчилсэн тайзны найруулгатайгаар үзэгчдэд хүрч буй циркийн “Alegría – In A New Light” шоунд оролцож байгаа юм.
