Өглөө.мн Шинэ өглөө, Шинэ мэдээлэл
Сэргээгдэх эрчим хүчний төслийн шалгаруулалт, үнийн дуудлага худалдаа буюу Монгол Улсын эрчим хүчний салбарын анхны аукционыг 2026 оны зургадугаар сарын 18-нд зохион байгууллаа.
Засгийн газрын 2026 оны дөрөвдүгээр сарын 29-ний хуралдаанаар Түлш, эрчим хүчний хараат байдлыг бууруулах тухай Засгийн газрын тогтоол баталж, Говьсүмбэр, Булган, Дундговь, Өвөрхангай, Хэнтий гэсэн 5 аймагт нарны цахилгаан станц, батарей хуримтлуурын төслийг хувийн хөрөнгө оруулалтаар хэрэгжүүлэх шийдвэр гаргасан.
Төсөлд 100 гаруй компани сонирхлоо илэрхийлснээс 19 компани сонгон шалгаруулалтад оролцлоо.
Хэнтий аймгийн Хэрлэн сумын нутагт хэрэгжих 20 МВт НЦС болон 15 МВт/40 МВт.цаг багтаамжтай батарей хуримтлуурын систем төслийн бие даасан эрчим хүч үйлдвэрлэгчийг шалгаруулах аукционд “Ар Жей И Монголиа” ХХК болон “Runxin Capital Holdings” Co.,Ltd” компанийн түншлэл 7.8 ам.цент/кВт.цаг үнээр яллаа.
Өвөрхангай аймгийн Хархорин сумын нутагт хэрэгжих 50 МВт НЦС болон 30 МВт/100 МВт.цаг багтаамжтай батарей хуримтлуурын систем төслийн аукционд “Монхорус Интернэшнл” компани, 5.75 ам.цент/кВт.цаг үнээр яллаа.
Дундговь аймгийн Сайнцагаан сумын нутагт хэрэгжих 50 МВт НЦС болон 30 МВт/100 МВт.цаг багтаамжтай батарей хуримтлуурын систем аукционд “Смарт найчурал энержи” компани, 4.85 ам.цент/кВт.цаг үнээр яллаа.
Булган аймгийн Орхон сумын “Булган” дэд станцад холбогдох 50 МВт НЦС болон 30 МВт/100 МВт.цаг багтаамжтай батарей хуримтлуурын системийн аукционд “Магнус сентурион констракшн-ZHEJIANG CHINT NEW ENERGY DEVELOPMENT CO.,LTD” компаниуд түншлэлээр, 5.95 ам.цент/кВт.цаг үнээр яллаа.
Говьсүмбэр аймгийн Сүмбэр сумын “Чойр” дэд станцад холбогдох 50 МВт НЦС болон 30 МВт/100 МВт.цаг багтаамжтай батарей хуримтлуурын системийн төслийн аукционд “Алхана трэйд” компани, 6.65 ам.цент/кВт.цаг үнээр яллаа.
Шалгарсан компаниудтай энэ сард гэрээ байгуулж, бүтээн байгуулалтын ажлыг эхлүүлнэ. Энэ онд багтааж нарны цахилгаан станцуудыг ашиглалтад оруулахаар ажиллаж байна.
Эх сурвалж: mongolia.gov.mn
