ЧД-ийн 72-р сургууль орчмын “ГЭР ХОРООЛЛЫН ДАХИН ТӨЛӨВЛӨЛТ”-ийн ажил эхэллээ

НИТХ-ын 2013 оны 02-р сарын 25-ны өдрийн 3/31 дүгээр тогтоолоор баталсан “Гэр хорооллын дахин төлөвлөлтийн үйл ажиллагаа”-ны журмын дагуу нийслэл хотын 12 байршилд гэр хорооллын дахин төлөвлөлтийн төсөл хэрэгжүүлэхээр болсон. Журмын дагуу 12 байршлын 8 байршилд иргэдийн 60-80 хувийн дэмжлэг авч, төсөл хэрэгжүүлэх эрхтэй болсон 8 аж ахуйн нэгжид  төсөл хэрэгжүүлэх “Батламж”-ийг нийслэлийн удирдлагууд гардуулсан юм. Энэ үеэр нийслэлийн ИТХ-ын дарга Д.Баттулга “06 сарын 20 гэхэд тодорхой хэсэгт газар чөлөөлөн, барилгын ажил эхэлсэн байх ёстой” гэсэн үүрэг өгсөн. Үүний дагуу “Батламж” авсан аж ахуйн нэгжүүд хэсэгчилсэн ерөнхий төлөвлөгөөгөө хийж, ажлын зургаа батлуулан, газрын зөвшөөрлөө авч, ажлаа эхлэх бүрэн боломжтой болж байна. Дээрх болзлыг бүрэн хангасан Чингэлтэй дүүргийн 13, 15-р хороо, 72-р сургуулийн орчмын 15 га газарт дахин төлөвлөлтийн төсөл хэрэгжүүлэх “Асар өргөө”, “Буурал сутай” ХХК-иуд тодорхой хэсэгт газар чөлөөлөн, бүтээн байгуулалтын ажлаа албан ёсоор эхлэх гэж байна. Эхний ээлжийн бүтээн байгуулалт хийх хэсгийн иргэдийг нүүлгэн, түр орон сууцанд оруулжээ. Тиймээс хугацаа алдалгүй ажлаа эхлүүлэхээр маргааш /06 сарын 06 / 12 цагт ЧД-ийн 72-р сургуулийн орчим шав тавих ёслол хийх гэж байна. Ёслолын ажиллагаанд нийслэлийн удирдлагууд, төсөл хэрэгжүүлэх аж ахуйн нэгж, иргэдийн төлөөлөл оролцоно гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.